وەزارەتی دەرەوەی ئێران ئاشكرایكرد، وڵاتەكەی یارمەتی حكومەتی عێراق دەدات بۆ ئاشكراكردنی ئەوانەی لە هەوڵی تیرۆركردنی كازمیدا تێوەگلاون.
سەعید خەتیب زادە وتەبێژی وەزارەتی دەرەوەی ئێران ئەمڕۆ دووشەممە لە كۆنگرەیەكی ڕۆژنامەوانیدا لە تاران ڕایگەیاند، “عێراق پێویستی بە نێوەندگیری نییە و حكومەتی خۆی هەیە و پەیوەندییەكانی لەگەڵ ئێراندا باشن و ئێران بەردەوامە لە یارمەتیدانی عێراق لەپێناو سەقامگیربوونی ئەو وڵاتە”.
وتەبێژی وەزارەتی دەرەوەی ئێران بەپێویستی زانی هەمووان هاوكاربن بۆ ئاشكراكردن و دۆزینەوەی ئەوانەی فەرمانیان بە هێرشەكەی سەر ماڵی كازمی كردووە و ئەوانەشی ئەنجامیانداوە، جەختیشیكردەوە لە هاوكاریی وڵاتەكەی لەو ڕووەوە بۆ عێراق.
سەعید خەتیب زادە لەدرێژەی قسەكانیدا ئەمریكای تۆمەتباركرد بەوەی هۆكاری تێكچوونی دۆخی ئەمنیی عێراقە.
