بە بڕیارێکی بەڕێوەبەرایەتیی خۆسەر لە باکوور و ڕۆژهەڵاتی سوریا، 46 خێزانی خەڵکی دیرەزوور، لە کامپی هۆل هێندرانە دەرەوە و ڕەوانەی زێدی خۆیان کرانەوە.
ساڵی ڕابردوو ئیدارەی خۆسەر لە ڕۆژئاوای کوردستان، بڕیاریدا بە گەڕاندنەوەی ئەو کەسانەی لە هاوکاریکردنی داعشدا تێوەنەگلاون بۆ زێدی خۆیان، لەو چێوەشدا دوێنێ 46 خێزان گەڕێندرانەوە ناوچەکانی دیرەزوور.
لە کامپی هۆل، سەرەڕای خێزان و خانەوادەی چەکدارانی داعش، دەیان کەسی سوری و عێراقی هەن، کە بەناچاری لەناو سنووری حوکمی داعشدا ژیاون و دوای کۆتاییپێهێنانی دەسەڵاتی داعش، ڕەوانەی کامپی هۆل کراون، ئەمە جگە لە بیانییەكانی ناو داعش.
ئیدارەی خۆسەر چەندینجار داوای لە وڵاتانی جیهان کردووە، کاربکەن بۆ گەڕاندنەوەی هاوڵاتییانی خۆیان، تا ئێستا چەند وڵاتێک ئامادەبوون هاوڵاتییەكانی خۆیان بگەڕێننەوە، بەشێكی دیكەشیان كاردانەوەیان بۆ وەرگرتنەوەی هاوڵاتییەكانیان نەرێنییە.
