مەکتەبی سیاسیی یەکێتی بە سەرپەرشتیی بافڵ تاڵەبانی كۆبووەوە، لیژنەیەک ڕاسپێردرا بۆ ئامادەکردنی پڕۆژەی یەکێتی بۆ ئیستیحقاقەکانی دوای پەسەندکردنی ئەنجامەکانی ھەڵبژاردن، بەردەوامیی چاكسازییە حزبی و ئۆرگانییەكانیش دووپاتكرایەوە و بڕیارەكانی ئەم دواییە بە دروست و پەیڕەوی وەسفدەكات.
ئێوارەی ئەمڕۆ مەکتەبی سیاسیی یەکێتیی نیشتمانیی کوردستان، بە سەرۆکایەتی بافڵ جەلال تاڵەبانی لە دەباشان کۆبووەوە، ، “تاوتوێی دۆخی سیاسیی ھەرێمی کوردستان و عێراق و دواپێشھاتەکان کرا”.
بەپێی ڕاگەیەندراوی كۆبوونەوەكە، “ھەڵسەنگاندنی بۆ پرۆسەی سیاسیی عێراقی دوای ھەڵبژاردنی ئەنجومەنی نوێنەران کرد و لیژنەیەکی تایبەتی ڕاسپارد بۆ ئامادەکردنی ڕوانین و پڕۆژەی یەکێتی بۆ ئیستیحقاقەکانی دوای پەسەندکردنی ئەنجامەکانی ھەڵبژاردن و بەشداریی کورد بە یەکڕیزییەوە لە بەدەستھێنانی مافەکانی گەلی کوردستان و دیاریکردنی ئەولەویاتەکانی ئەو دۆسیەیە”.
“کۆبوونەوەی مەکتەبی سیاسی، وێرای تەئکیدکردنەوە لەسەر بەردەوامیی پرۆسەی چاکسازیی حزبی و ڕێکخراوەیی، ئۆرگان و مەکتەبەکانی ڕاسپارد لەبەر ڕۆشنایی دوا بڕیارە دروست و پەیڕەوییەکانی یەکێتیدا، سەرجەم ھەڤاڵان جۆشبدەنەوە و بۆ قۆناغی لەمەودوای یەکێتییانە سازیان بدەن”، لە ڕاگەیەندراوەكەدا وا هاتووە.
