لە هەولێر، بەهۆی دەستكاریكردنی ئاوەڕۆی پڕۆژەی شاری زێڕینەوە، خاوەنی پڕۆژەكە دەستگیركرا، ڕەخنەی ئەوەی لێدەگیرێت، درەنگ بەهانای دانیشتووانی پڕۆژەكەوە چووە و ئاگادارینەكردوونەتەوە.
سەرچاوەیەكی ئاگادار لە پارێزگای هەولێر بە تۆڕی میدیایی ئێستای ڕاگەیاند، لە شەوی ڕابردووەوە خاوەنی پڕۆژەی شاری زێڕین دەستگیركراوە.
هۆكاری دەستگیركردنەكەی بۆ ئەوە گەڕاندەوە كە دەستكاریی ئاوەڕۆی پڕۆژەكەی كردووە و ئەوەش بووەتە هۆی كۆبوونەوەی ئاو و دروستبوونی لافاوێكی زۆر، ئەمە جگە لەوەی دوای دروستبوونی لافاوەكەش درەنگ بەدەم دانیشتووانی پڕۆژەكەوە ڕۆیشتوون.
سەرچاوەكە نەیویست زانیاریی زیاتر بدات، وتی، ئومێد خۆشناو پارێزگاری هەولێر لە كۆنفرانسێكی ڕۆژنامەوانیدا كاتژمێر 12:00ی نیوەڕۆ وردەكاریی زیاتر لەسەر لافاوەكەی دوێنێی پارێزگاكە دەخاتەڕوو.
پڕۆژەی شاری زێڕین یەكێك بوو لە زیانمەندترین شوێنەكانی هەولێر بەهۆی لافاوەكەوە، نزیكەی 200 خانوو و ژمارەیەكی زۆر ئۆتۆمبێل زیانیان بەركەوت.
