كۆمسیۆنی باڵای سەربەخۆی هەڵبژاردنەكانی عێراق ڕایدەگەیەنێت، چاویان بە تانە پێشكەشكراوەكانی ئەنجامە بەراییەكانی هەڵبژاردن خشاندووەتەوە و بڕیاریانداوە زیاتر لە دووهەزار وێستگەی دەنگدان جارێكی دیكە بەدەستی هەژماربكرێنەوە.
لە ڕاگەیەندراوێكدا كۆمسیۆنی باڵای سەربەخۆی هەڵبژاردنەكانی عێراق ئاماژەی بەوەكردووە، ئەنجومەنی كۆمسیاران لێكۆڵینەوەی لەسەر تانەی لایەن و هاوپەیمانێتییەكان كردووە لەبارەی ئەنجامە بەراییەكان و چاوی بە تەواوی تانەی لایەن و كاندید و هاوپەیمانێتییەكان خشاندووەتەوە.
باسی لەوەشكردووە، ئەنجومەنی كۆمسیاران بڕیاریداوە كە ئەو وێستگانەی تانەی لێدراوە و ژمارەیان دووهەزار وێستگەیە جارێكی دیكە بەدەست هەژماربكرێنەوە و سبەی لە نەینەوا ئەو پرۆسەیە دەستپێدەكات.
هەروەها لە پارێزگای بابل ڕۆژی پێنجشەممە و ڕۆژی هەینی بەشی ڕەسافەی بەغداد جیاكردنەوەی دەنگەكان بەشێوەی دەستی ئەنجام دەدرێت.
كۆمسیۆن داواش لە كاندید و نوێنەری ئەو لایەنانە دەكات كە تانەیان لە ئەنجامەكانی هەڵبژاردنداوە دەتوانن ئامادەی دووبارە جیاكردنەوەی دەنگەكان بن كە بەشێوەی دەستی دەكرێت.
لە بەشێكی دیكەی ڕاگەیەندراوەكە هاتووە، دوای جیاكردنەوە و یەکلاکردنەوەی داواکارییەکان ئەنجامە کۆتاییەکان ڕادەستی دادگای فیدراڵی دەکرێت.
