پەرلەمانی کوردستان سبەینێ سێشەممە کۆدەبێتەوە و هەردوو پرسی گرانبوونی بەنزین و گرفتەکانی سووتەمەنی، هەروەها داواکارییەکانی مامۆستایانی وانەبێژ تەوەری کۆبوونەوەکە دەبن و لیژنە پەیوەندیدارەکانیش ڕاپۆرتیان لەوبارەیەوە دەدەنە پەرلەمان.
ئەمڕۆ دووشەممە لیژنەی وزە و سامانە سروشتییەکان لەبارەی پرسی گرانبوونی بەنزین و لیژنەی پەروەردە و خوێندنی باڵا سەبارەت بە پرسی مامۆستایانی وانەبێژ کۆبوونەوە و هەردوو لیژنە ڕاپۆرتیان لەبارەی کێشەکانەوە ئامادەکردووە.
لەوبارەیەوە شێرکۆ جەودەت ئەندامی لیژنەی وزە و سامانە سروشتییەکانی پەرلەمانی کوردستان بە تۆڕی میدیایی ئێستای وت، “هەرچەندە وەزیری سامانە سروشتییەکان بانگهێشتکرابوو بۆ کۆبوونەوەی ئەمڕۆی لیژنەکەمان، بەڵام ئامادەنەبوو و کۆبوونەوەکە بەبێ وەزیری پەیوەندیدار ئەنجامدرا”.
سەبارەت بە ئەنجامی کۆبوونەوەکە شێرکۆ جەودەت ڕایگەیاند، ڕاپۆرتێک تایبەت بە گرانبوونی بەنزین و کۆی کێشەکانی سووتەمەنی، هەروەها ڕێگەچارەکانیش لە کۆبوونەوەی ئەمڕۆدا ئامادەکراوە و سبەینێ لە کۆبوونەوەی پەرلەمان پێشکەشدەکرێت.
“چەندین جاری پێشوو داوامان لە وەزیری سامانە سروشتییەکان کردووە و بانگهێشتمانکردووە بۆ کۆبوونەوەی پەرلەمان لەبارەی کێشەکانی سووتەمەنی، بەڵام هیچ جارێک ئامادەنەبووە و سبەینێش ئامادەنابێت، لەگەڵ ئەوەی پێشتر داوای ئامادەبوونی لێکراوە”، شێرکۆ جەودەت وای وت.
پرسی مامۆستایانی وانەبێژ تەوەرێكی دیكەی کۆبوونەوەی سبەینێی پەرلەمان دەبێت و موسلیم عەبدوڵڵا بڕیاردەری لیژنەی پەروەردە و خوێندنی باڵا بە تۆڕی میدیایی ئێستای ڕاگەیاند، “ئەمڕۆ لیژنەکەمان لەبارەی کێشە و داواکارییەکانی مامۆستایانی وانەبێژ کۆبووەوە، ڕاپۆرتمان بۆ کۆبوونەوەی سبەینێی پەرلەمان ئامادەکردووە تیایدا گرفتەکانی مامۆستایانی وانەبێژ و چارەسەرەکانیشمان خستووەتەڕوو، سبەینێش لە پەرلەمان قسەمان دەبێت لەوبارەیەوە”.
ئەندامەکەی لیژنەی پەروەردەش بەهەمانشێوە باسی لەوەکرد، کە لەگەڵ ئەوەی بانگهێشتی وەزیری پەروەردە کراوە، بەڵام ئامادەی کۆبوونەوەکە نابێت و “هەرجارە و بە هۆکارێکی جیاواز ئامادە نابێت”.
