بەهۆی قەیرانی دابەزینی نرخی لیرە و چەند پرسێکی ناوخۆیی وەک ئازادی ڕادەبڕین، ڕەجەب تەیب ئەردۆغان سەرۆک کۆماری تورکیا ماوەیەکە ڕووبەڕووی ڕەخنەی توند بووەتەوە و سەرۆکی پارتی گەلی کۆماریش دەڵێت، “بەمزووانە ئەردۆغان و مافیاکانی دەسەڵات بەجێدەهێڵن”.
کەمال کلیچدار ئۆغڵۆ، سەرۆکی پارتی گەلی کۆماری تورکیا، دوای بڕیاری دەرکردنی 10 باڵیۆزی وڵاتان لە تورکیا لەلایەن ئەردۆغانەوە ڕایگەیاند، “ئێمە دڵنیاین کە گرانی و نادادپەروەری سەری ئەردۆغان دەخۆن و بارگە دەپێچێتەوە”.
وتەکانی کەمال کلیچدار ئۆغڵۆ لە ڕۆژنامەی “زەمان”ی تورکییەوە بڵاوکرانەوە و بەپێی وتەی ئەو، پارتی گەلی کۆماری لە هەڵبژاردنی داهاتوودا سەرکەوتن بەدەستدەهێنێت”.
دەنگە ناڕازییەکانی دژ بە ئەردۆغان سەبارەت بە سیاسەتی دەرەوەی تورکیا دەڵێن، “ئەردۆغان لەبری چاکسازیی ئابوری و هەوڵدان بۆ ڕاگرتنی کەوتنی نرخی لیرە، شەڕ بە وڵاتانی دەرەوە دەفرۆشێت”.
هاوکات ئەحمەد داود ئۆغڵۆ، کە هاوڕێیەکی کۆنی ئەردۆغانە و ئێستا سەرۆکایەتیی حزبی ئاییندە دەکات ڕایگەیاندووە، “بڕیاری دەرکردنی 10 باڵیۆزی وڵاتانی دەرەوە، پەیوەندی بە عوسمان کاڤالاوە نییە و ئەردۆغان دەیەوێت بازرگانی بە سیاسەتی دەرەوەی وڵاتەوە بکات بۆ بەرزکردنەوەی ئاستی جەماوەری”.
