لە دیالە پێنج كەس لەسەر دەستی داعش كوژران، ئەفسەرێكی پۆلیس دەڵێت، یەكەمجار شوانێكیان كوشتووە و ناوسكیان بۆمبڕێژ كردووە و دواتر بە كەسوكارەكەیدا تەقیوەتەوە.
شەعلان كاملی، ئەفسەر لە پۆلیسی دیالە ئەمڕۆ سێشەممە 27ی تشرینی یەكەم ڕایگەیاند، چەكدارانی داعش ناوسكی شوانێك-یان لە قەزای میقدادییە-ی باكوری شاری شارەبان هەڵدڕیوە و دواتر تەرمەكەیان بۆمبڕێژ كردووە.
وتیشی، “تەرمەكە بە كەسوكاری قوربانییەكەدا تەقیوەتەوە كاتێك ویستویانە بەرزی بكەنەوە و بەهۆیەوە چوار كەسی دیكە كوژراون”.
ئەفسەرەكەی پۆلیس ڕوونیشیكردەوە، پاش ڕووداوەكە هێزە ئەمنییەكان هەڵمەتێكی گەڕان و پشكنینیان لە ناوچەكەدا بەدوای چەكدارەكاندا دەستپێكردووە.
لە سەرەتای ئەمساڵەوە هێرشی چەكدارانی داعش بەتایبەت لە ناوچەكانی نێوان كەركوك و سەڵاحەدین و دیالە كە بە “سێگۆشەی مەرگ” ناسراوە زیادیكردووە.
لە ساڵی 2017 عێراق سەركەوتنی بەسەر داعش و كۆنتڕۆڵكردنی ئەو ناوچانەی لەژێر دەسەڵاتی گروپەكەدا بوو ڕاگەیاند، بەڵام لەوكاتەوە چەكدارانی گروپەكە ناوبەناو لە هێرشی چەكداری و تەقاندنەوە بەردەوامن.
