لە كۆی 3681 وێستگەی سڕكراو، جیاكردنەوەی دەستی بۆ 95%یان كراوە، وەك ئەوەی كۆمسیۆنی هەڵبژاردن دەیڵێت.
عیماد جەمیل، ئەندامی تیمی ڕاگەیاندنی كۆمسیۆنی باڵای سەربەخۆی هەڵبژاردن لە عێراق ڕایگەیاند، تائێستا جیاكردنەوە و ژماردنی 95%ی كۆی ئەو وێستگانە تەواوكراوە كە ژمارەیان سێ هەزار و 681 وێستگەیە.
وتیشی، “كۆی سكاڵاكان گەیشتووەتە 356، دووانیان سوورن”.
“ئەنجامی جیاكردنەوەی دەستی هاوتابووە لەگەڵ ئەنجامی ئەلیكترۆنی، ئەم كارەش بە ئامادەبوونی چاودێری لایەنەكان و چاودێرە نێودەوڵەتییەكان بەڕێوەچوو”، عیماد وای وت.
ئەوەشی خستەڕوو، ئەنجامی ئەو وێستگانە دەخرێنە پاڵ ئەنجامە بەراییەكانی دیكە.
سەبارەت بە سكاڵاكانیش، بەپێی وتەی ئەو ڕاگەیاندنكارەی كۆمسیۆن نزیكەی 85%ی سكاڵا زەرد و سەوز و سوورەكان یەكلاكراونەتەوە و بڕیاری ئەنجومەنی كۆمسیارانی پێدەردەچێت.
یەكشەممەی هەفتەی ڕابردوو 10ی تشرینی یەكەم هەڵبژاردنی پێشوەختەی ئەنجومەنی نوێنەرانی عێراق بەڕێوەچوو، تائێستا كۆمسیۆن تەنها ئەنجامی بەرایی ڕاگەیاندووە بەهۆی یەكلانەبوونەوەی ئەنجامی تەواوی وێستگەكان.
