دژی ئەو دادوەرەی لێكۆڵینەوە لە تەقینەوەكەی بەندەری بەیروت دەكات، خۆپیشاندانی لایەنگرانی حزبوڵڵا و بزوتنەوەی ئەمەلی نزیک لە ئێران، له بەیروتی پایتەختی لوبنان بەڕێوەچوو، بە گوللـەی هێزە ئەمنییەکان شەش كەس کوژران و چەند کەسێکی دیکەش بریندار بوون.
میدیاكانی لوبنان بڵاویانكردەوە، لە گردبوونەوەكەی ئەمڕۆی لایەنگرانی حزبوڵڵا و بزوتنەوەی ئەمەل، دژ بە هەوڵەکانی “تارق ئەلبەیتار” دادوەر و لێکۆڵەر لە دۆسیەی تەقینەوەکەی بەندەری بەیروت، هێزە ئەمنییەكان تەقەیان كردووە.
بەپێی ئامارەكانی وەزارەتی ناوخۆی لوبنان، بە تەقەی هێزەئەمنییەكان شەش كەس کوژراون و 16 خۆپیشاندەری دیکەش بریندار بوون.
لایەنگرانی حزبوڵڵا ڕەوتی لێكۆڵینەوەكانی دادوەرەكە ڕەتدەكەنەوە و دەڵێن، “بە سیاسی كراوە”، بۆیە ئەمڕۆ ڕژانە سەر شەقامەكانی بەیروت.
تەقینەوەکەی ساڵی ڕابردووی بەندەری بەیروت بە یەکێک لە بەهێزترین تەقینەوە نائەتۆمییەکانی جیهان دادەنرێت لە مێژوودا، بەهۆیەوە زیاتر لە 200 کەس گیانیان لەدەستدا و هەزاران برینداریشی لێکەوتەوە، ڕووبەرێکی فراوانیشی لە بەیروت وێرانکرد.
