لەسەر لێپرسینەوە لە شۆفێرێكی تیژڕەو لەناو یەكێك لە پڕۆژەكانی نیشتەجێبوون، كارمەندێكی سیكیوریتی لەلایەن شۆفێرەكەوە كوژرا.
بەپێی زانیارییەكانی تۆڕی میدیایی ئێستا، شەوی ڕابردوو لەبەردەم پڕۆژەی نیشتەجێبوونی “دەروازە ستی” كارمەندێكی پڕۆژەكە لەلایەن شۆفێرێكەوە بە گولـلە كوژراوە.
پێشتر كارمەندەكە لەسەر تیژڕەوی لەناو پڕۆژەكەدا لێپرسینەوەی لە شۆفێرەكە كردووە و داوای لێكردووە پابەندی سنووری دیاریكراوی لێخوڕین بێت.
هەر بەپێی زانیارییەكان دواتر شۆفێرەكە گەڕاوەتەوە و دوای دروستبوونی دەمەقاڵە، دوو فیشەكی بە كارمەندەكەوە ناوە كە ناوی (هەڤاڵ محەمەد کاکەخان)ە و بەهۆیەوە گیانیلەدەستداوە و تۆمەتباری ڕووداوەكەش هەڵهاتووە.
تۆڕی میدیایی ئێستا هەوڵی دا زانیاریی زیاتر لە وتەبێژی پۆلیسی سلێمانی وەربگرێت، بەڵام پەیوەندییەكەی بەردەست نەبوو.
