وەفدێكی یەكێتی بە سەرۆكایەتی بافڵ تاڵەبانی سەردانی بزوتنەوەی گۆڕانی كرد و هاوسەرۆكی یەكێتی دەڵێت، بزوتنەوەی گۆڕان بە شەریکی ڕاستەقینە دەزانین و وەک ھاوبەشێکی سیاسی گرنگ دەمانەوێت پێکەوە ئاڕاستەی سیاسی بگۆڕین.
ئێوارەی ئەمڕۆ وەفدێکی یەکێتیی نیشتمانیی کوردستان بە سەرۆکایەتی بافڵ تاڵەبانی سەردانی بزوتنەوەی گۆڕانی کرد و لەلایەن عومەر سەید عەلی، ڕێکخەری گشتیی بزوتنەوەی گۆڕان و ژمارەیەک ھەڵسوڕاو پێشوازیکران.
بەپێی ڕاگەیەنراوی نوسینگەی، بافڵ تاڵەبانی لە دیدارەکەدا ڕوونیکردەوە، یەکێتی، بزوتنەوەی گۆڕان بە شەریکی ڕاستەقینەی خۆی دەزانێت و وەک ھاوبەشێکی سیاسی گرنگ دەمانەوێت پێکەوە ئاڕاستەی سیاسی بگۆڕین و داکۆکی لە مافەکانی گەلەکەمان بکەین.
وتیشی، “دەمانەوێت پێکەوە پرۆژەی نوێمان ھەبێت و بەدیدێکی نوێوە کاربکەین بۆ کوردستانەکەمان”.
بافڵ تاڵەبانی ئەوەشی خستەڕوو، ئەو کورسیانەی هاوپەیمانی كوردستان بەدەستیھێناوە بەرھەمی ھەوڵی گۆڕان و یەکێتی بوو کە بەو ژمارە كاندیدەوە دەچێتە بەغداد بۆ داكۆكیكردن لە بەرنامەی كوردستانی و زامنكردنی شایستە دارایی و سیاسییەكانی كوردستان بە ناوچە دابڕاوەكانیشەوە، ئەركی داكۆكیكردنی لە مافەكانی گەلی كوردستانی گرتۆتەئەستۆ و بە یەكڕیزی هاوپەیمانی لەگەڵ نوێنەرایەتی دیكەی كورد دەتوانین خۆشگوزەرانی زیاتر و ئارامی دابینبکەن.
ڕوونیشیکردەوە، لەژیانی سیاسیدا حیزب بەزۆر ھەوراز و نشێودا دەڕوات، بەڵام گرنگ ئەوەیە یەکێتی و گۆڕان لە چوارچێوەی ھاوپەیمانی کوردستان بەرەو پرۆژەی سیاسی ھەنگاوبنێین و خەونی کاک نەوشیروان و سەرۆک مام جەلال جێبەجێبکەن بۆ گۆڕینی سیستەمی سیاسی و پرۆژەی ھاوبەشیشیان ھەبێت بۆ چاکسازی و زیاتر خزمەتکردنی خەڵک و گۆڕانکاریی ڕیشەیی لە ئیدارەدان، بەڕێوەبردن، چارەسەرکردنی کەموکوڕییەکان، گلەیی و ڕەخنەکانی کۆمەڵانی خەڵکیش بەھەند وەربگرن و بیکەنە دەستمایەی سەرکەوتنی داھاتوومان.
ھاوسەرۆکی یەكێتی دووپاتیشکردەوە، لەگەڵ براکانیان لە گۆڕان پێکەوە دەمێننەوە و کار بۆ ئایندەیەکی گەشتر دەکەن.
