×


کوردی      English
تۆڕی میدیایی ئێستا
تۆڕی میدیایی ئێستا

مەسرور بارزانی: ژێرخانی تەندروستیی ستاندارد لە کوردستاندا بوونی نییە

2020-09-21
مەسرور بارزانی، سەرۆکی حکومەتی هەرێمی کوردستان
فۆتۆ: ڕاگەیاندنی سەرۆكی ئەنجومەنی وەزیران
ئێستا - هەولێر
ئێستا
سەرۆكی حكومەتی هەرێم ئەمڕۆ دووشەممە 21ی ئەیلول ڕایگەیاند، بۆ دابینكردنی كەلوپەل و پێداویستیی نەخۆشخانەكان نزیکەی 23 ملیار دینارمان خەرج کردووە و وتیشی، "ژێرخانێکی تەندروستی لەسەر بنەمای ستانداردی جیهانی لە کوردستان تا ئێستا بوونی نەبووە".

مەسرور بارزانی، سەرۆكی حكومەتی هەرێمی كوردستان ئەمڕۆ لە هەولێر سەردانی سەنتەری هەماهەنگیی فریاکەوتن (122) و بەڕێوەبەرایەتیی بانکی خوێنی كرد.

بەپێی ڕاگەیەنراوێكی سەرۆكایەتیی ئەنجومەنی وەزیران، مەسرور بارزانی بەشەکانی سەنتەری فریاکەوتن و بانکی خوێنی بەسەرکردەوە و لە نزیکەوە لە کێشە و خواست و داواکارییەکانیانی کۆڵییەوە.

سەرۆكی حكومەت لە لێدوانێكیشیدا بۆ میدیاكان ئاماژەی بەوەدا، حکومەتی هەرێم گرنگییەکی زۆر بە کەرتی تەندروستی دەدات.

وتیشی، "وەک هەموو کەرتەکانی تر بەداخەوە ژێرخانێکی تەندروستی لەسەر بنەمای ستانداردی جیهانی لە کوردستان تائێستا بوونی نەبووە. ئێمە هەموو هەوڵێک دەدەین لەگەڵ وەزارەتی تەندروستی و پسپۆڕەکان بۆ ئەوەی بتوانین گەشە بەم کەرتە بدەین تا بتوانن زیاتر خزمەتی هاوڵاتییان بکەین".

سەرۆكی حكومەت سوپاسی سەرجەم پزیشک و فەرمانبەر و کارمەندانی تەندروستی كرد و وتی، "سوپاسێکی بێ پایانی هەموو ئەو پزیشک و ئەو فەرمانبەرانە دەکەم کە لە هێڵی پێشەوەن بۆ ڕوبەڕوبوونەوەی ئەم پەتایەن. داوا لە هەموو هاوڵاتییانیش دەکەم لەپێناو سەلامەتی خۆیان و کەسوکاریان، خۆیان بپارێزن".

دەربارەی هەوڵەكانی حكومەتیش لەڕووی دابینکردنی پێداویستییەکانی نەخۆشخانەكان ئەوەی خستەڕوو، نزیکەی 23 ملیار دینارمان خەرج کردووە بۆ دابینکردنی سیتی سکان و ئێم ئاڕ ئای و ئەو پێداویستییە پزیشکییانەی لە خەستەخانەکان پێویستیان پێی هەبووە. هەروەها 40 ملیار دیناریش بۆ دابینکردنی پێداویستییەکانی نەخۆشییەکانی شێرپەنجە لە لایەن حکومەتەوە تەرخان کراوە کە بێگومان کاریگەریی هەبووە لە چارەسەرکردنی ئەو نەخۆشانە.

ئاماژەی بەوەشدا، لەم ماوەیەی کە پەتای کۆرۆناش هاتووەتە کوردستان زیاتر لە 45 ملیار دینار لە لایەن حکومەتەوە لە هەموو شارو شارۆچکە و پارێزگاکانی هەرێمی کوردستان خەرج کردووە بۆ ئەوەی ڕووبەڕووی ئەو پەتایە ببینەوە.



‌ئێستا