کوردی      English
تۆڕی میدیایی ئێستا
تۆڕی میدیایی ئێستا

جیۆکۆڤیچ نازناوی ڕۆمای کراوەی بەدەستهێنا و مێژووی نوسییەوە

21/09/2020
نۆڤاک جیۆکۆڤیچ نازناوی ژمارە 36ی ماستەرزی لە مێژوویدا بەدەستهێنا
فۆتۆ: دەیلی سەباح
وەرزشی ئێستا

ئەستێرەی ناوداری بواری تێنسی سەرزەوی، نۆڤاک جیۆکۆڤیچ لە یاری کۆتایی پاڵەوانیەتی ڕۆمای کراوە بردنەوەی بەرانبەر دیێگۆ شوارتزمانی ئەرجەنتینی بەدەستهێنا و نازناوەکەی چنییەوە.

شوارتزمان کە پاڵێوراوی هەشتەمە لە پاڵەوانێتییەکە، لە سەرەتاوە ئاستێکی بەرزی پێشکەشکرد و دووجار سێرڤی جیۆکۆڤیچی شکاند و بە ئەنجامی (3-0) پێشەنگی گرت، بەڵام لەدوای تێپەڕبوونی کات ئەستێرە سڕبییەکە هاوسەنگی وەرگرتەوە و ئەنجامەکەی یەکسانکردەوە.

سەرەڕای ئەنجامدانی (18) هەڵەی لەسەریەک، لە کۆتاییەکانی ئەو کۆمەڵەیەدا بە لێدانە بەهێزەکان لە بەشی دواوەی یاریگا نۆڤاک کۆنتڕۆڵی یارییەکەی کرد و کۆمەڵەی یەکەمی بە ئەنجامی (7-5) یەکلاییکردەوە.

لە کۆمەڵەی دووەمیشدا شوارتزمان گەڕایەوە و دووبارە سێرڤی یەکەمی ڕیزبەندی جیهانی شکاند، بەڵام ئەمجارە نۆلیتۆ بەخێرایی گەڕایەوە و ڕیتمی یارییەکەی بەهێزتر کرد، تاوەکو ئەو کۆمەڵەیەی بە ئەنجامی (6-3) بردەوە.



بردنەوەی نازناوی ماستەرزی ڕۆما بۆ نۆڤاک جیۆکۆڤیچ مێژوو بوو، بەوپێیەی نازناوی ژمارە (36)ی دەکرد لە تەمەنی وەرزشییدا و ئەوەش بەرزترینە لە مێژووی یاریزانانی تێنسی سەرزەوی.

لەدوای دوورخستنەوەی نۆڤاک لە پاڵەوانیەتی ئەمریکای کراوە، گەڕانەوە لە ڕۆما هەنگاوێکی بەهێز و یەکلاکەرەوەبوو بۆ وەڵامدانەوەی ڕەخنەکان، بەوپێیەی لەم وەرزەدا لە کۆی (32) ڕوبەڕوبوونەوە توانیویەتی (31) بردنەوە بەدەستبهێنێت.