×


کوردی      English
تۆڕی میدیایی ئێستا
تۆڕی میدیایی ئێستا

خانەقین بەهۆی كۆرۆناوە چاوی لە دەستی حكومەتی هەرێمە

2020-09-15
پشكنینی كۆرۆنا لە خانەقین
فۆتۆ: ئێستا
ئێستا - خانەقین
ئێستا
چەند ڕۆژێكە ژمارەی توشبوون بە كۆرۆنا لە شاری خانەقین زیادیكردووە، بەڕیوبەری تەندروستیی شارەكەش دابەزینی پلەی گەرما بە هۆكار دەزانێت، ئاماژە بەوەشدەكات ناتوانن ئاماری ئەو نەخۆشییە كۆنتڕۆڵ بكەن.

شاری خانەقین لەڕووی ئیدارییەوە سەربە پارێزگای دیالەیە، بەڵام دەكەوێتە سنوری ناوچە كوردستانییەكانی دەرەوەی ئیدارەی هەرێمی كوردستان، دانیشوانی شارەكە داوا لە حكومەتی هەرێم دەكەن بە دەمیانەوە بچێت.

كۆرۆنا لە خانەقین
چەند ڕۆژێكە میدیا عێراقییەكان باس لەوە دەكەن كۆرۆنا لە دیالە لە كۆنتڕۆڵ دەرچووە، هەروەها لە شاری خانەقین ماوەی چەند ڕۆژێكە ژمارەی توشبوان بەرزبوەتەوە.

سەرمەد حاجی یونس، بەڕێوبەری تەندروستیی خانەقین تایبەت بە تۆڕی میدیایی ئێستای وت، "چوار بۆ پێنج ڕۆژە كۆرۆنا لە دیالە و خانەقین زۆر بووە، بەڵام هێشتا لە كۆنتڕۆڵ دەرنەچووە، پێمان وایە بەهۆی ئەوەی پلەی گەرما دابەزینی بەخۆیەوە بینیوە بۆیە ڕێژەی توشبوون زیادیكردووە".

سەبارەت بە ئاماری توشبوون بە كۆرۆنا لە شارەكە، بەڕێوبەری تەندروستیی خانەقین ئاماژەی بەوەكرد، "ئاماری وردمان لەسەر توشبوون بە كۆرۆنا لا نییە، چونكە بۆمان كۆنتڕۆڵ ناكرێت ئەویش بەهۆی ئەوەی هەندێك كەس خۆی كەرەنتین كردووە، چەند كەس لە نەخۆشخانە بێت دوو هێندە لە دەرەوەن".

"بەگوێرەی ئەوەی لای ئێمە تۆمار كراوە، لە شاری خانەقین ژمارەی ئەو كەسانەی بە كۆرۆنا مردوون لە 25 كەس تێپەڕیان كردووە"، سەرمەد حاجی یونس وای وت.



"خۆپارێزی خەڵك سفڕە"
وێڕای ئەوەی بەرپرسانی ناوچەكە هۆشداری دەدەن لە پەتاكە و داوا لە خەڵكی دەكەن كە پابەندبن بە ڕێنماییەكانی خۆپارێزی، بەڵام دانیشتوانی خانەقین ئەو پرسەیان بە هەند وەرنەگرتووە.

ئەمیر خانەقینی، چالاكوانی خانەقین بە تۆڕی میدیایی ئێستای وت، "توشبوون لە دیالە و خانەقین زۆرە و خەڵكیش بەهیچ جۆرێك پابەندی خۆپارێزی نابێت".

ئەو چالاكوانەی خانەقین ئەوەشی خستەڕوو، خەڵكی شارەكە توشی دڵەڕاوكێ بوون بەهۆی زۆری ژمارەی ئەو كەسانەی توشی پەتاكە بوون.

لای خۆیەوە بەڕێوبەری تەندروستیی خانەقین ئاماژەی بەوەكرد، "خەڵكی خانەقین پابەندبوونیان بە ڕێنماییەكانی خۆپارێزییەوە سفڕە و بەهیچ جۆرێك گوێ بە ڕێنماییەكانمان نادەن".

ئەو بەرپرسە داواشی لە دانیشتوانی خانەقین كرد، خۆیان بپارێزن و لە شوێنی قەرەباڵغ دووربكەونەوە و دەمامك و بابەتەكانی پاكوخاوێنی بەكاربهێنن، بۆ ئەوەی بتوانرێت كۆتایی بە حاڵەتەكانی توشبوون بهێندرێت.



داواكارییەكان ڕوبەڕوی حكومەتی هەرێمن
بەڕێوەبەری تەندروستیی خانەقین دەڵێت، هەرچەندە لەڕوی ئیدارییەوە سەربە پارێزگای دیالەن، بەڵام چاویان لە حكومەتی هەرێمە كە بەدەمیانەوە بچێت و هاوكارییان بكات.

ئەو بەرپرسەی خانەقین نەیشاردەوە كە پشتگیرییان هەیە لەلایەن حكومەتی هەرێم و بەغدادەوە، بەڵام ڕاشیگەیاند، "هیوادارین حكومەتی هەرێم زیاتر چاوی لە شارەكە بێت، خەڵكی ئەمشارە گلەیی لە بەغداد ناكات، بەڵام لە هەرێمی كوردستانی دەكات چونكە خەڵكەكە كوردن".

ئەمیر خانەقینی لەبارەی خزمەتگوزارییە تەندروستییەكانەوە ئاشكرایكرد، "بەڕاستی شاری خانەقین لەلایەن هەردوو حكومەتی هەرێم و بەغدادەوە پشتگوێ خراوە".

ئەو چالاكوانە ڕوی داواكارییەكانی كردە حكومەتی هەرێم و داوای بەدەمەوەچوونی شارەكەی كرد، هاوشێوەی شار و پارێزگاكانی دیكەی هەرێم.




‌ئێستا