×


کوردی      English
تۆڕی میدیایی ئێستا
تۆڕی میدیایی ئێستا

حزبوڵا هەڕەشە لە کازمی دەکاتەوە: هەرگیز بەبێ سزا دەربازت نابێت

2020-07-31
مستەفا کازمی لە مەزارگەی ئیمام حسێن دوعا دەکات، کەربەلا
فۆتۆ: جەمال پێنجوێنی
ئێستا - عێراق
ئێستا
کەتائبی حزبوڵا-ی عێراقی، ئەمڕۆ هەینی 31ی تەمموز، جارێکی دیکە هەڕەشەی لە سەرۆکوەزیرانی عێراق مستەفا کازمی کرد و جەختیکردووەتەوە لەوەی بەبێ تۆڵەسەندنەوە لە بەرانبەر خوێنی "قاسم سولەیمانی و ئەبومەهدی موهەندیس و شەهیدانی قائیم"، هەرگیز دەربازی نابێت.

بەپرسی ئەمنی لە کەتایبی حزبوڵای عێراق، ئەبو عەلی عەسکەری، لە هەژماری تایبەتی خۆی لە تویتەر نووسیویەتی، "ئەم ماوانە هەرگیز جەژنی ئێمە نابن، تا ئەو کاتەی تۆڵەی کوشتنی شەهیدان سولەیمانی و موهەندیس و شەهیدانی قائیم، نەکەینەوە، تۆڵەیەک کە شایانی قەبارەی ئەو ڕووداوانە بن".

بەرپرسە ئەمنییەکەی حزبوڵای عێراقی وتوویەتی، "ئەوەی لە پێشتردا وتوومانە دووپاتی دەکەینەوە: ئەوانەی لە ناوخۆ [عێراق]، هەر لە "کازمیی ناپاک"ـەوە هەتا ئەوانەی نزمترین پلەیان هەیە، بەشدار بوونە لە ئاسانکاریکردن بۆ ئەو تاوانە مێژووییە، بەهیچ شێوەیەک لە سزا دەربازیان نابێت، جا باجەکەی هەرچییەک بێت و کاتەکەشی هەرچەند بخایەنێت".

پێشتریش کەتایبی حزبوڵای عێراق، سەرۆکوەزیران مستەفا کازمی بەوە تۆماتبار کردبوو کە دەستی هەبووە لە ئاسانکاری بۆ ئەمریکییەکان لە پرۆسەی کوشتنی قاسم سولەیمانی و ئەبومەهدی موهەندس لە نزیک فڕۆکەخانەی نێودەوڵەتیی بەغداد، لە سێی کانوونی دووەمی ئەمساڵ. لای خۆشیەوە سەرۆکوەزیرانی عێراق ئەو دەنگۆیانە بەدرۆ خستبووەوە و نکووڵی لێکردبوو.

لە لایەکی دیکەشەوە، ئەمریکا لە بەرانبەر ئەو هێرشە مووشەکییانەی دەکرانە سەر بنکە و بارەگاکانیان لە عێراق، حزبوڵایان تۆمەتبار کردووە.



‌ئێستا