×


کوردی      English
تۆڕی میدیایی ئێستا
تۆڕی میدیایی ئێستا

وته‌بێژى فه‌رمانده‌ى گشتیى هێزه‌ چه‌كداره‌كان: پێشمەرگە لە کەرکووک بڵاوەی پێناکرێت

2020-07-06
یەحیا ڕەسوڵ، وته‌بێژى فه‌رمانده‌ى گشتیى هێزه‌ چه‌كداره‌كان
فۆتۆ: Facebook
ئێستا - بەغداد
ئێستا
وته‌بێژى فه‌رمانده‌ى گشتیى هێزه‌ چه‌كداره‌كان، عه‌مید یه‌حیا ڕه‌سوڵ لە ڕۆژی دووشەممە ڕایگەیاند کە هیچ بڕیارێک نییە بۆ بڵاوەپێکردنی هێزی پێشمەرگە لە پارێزگای کەرکووک.

عەمید یەحیا ڕەسوڵ ڕاشیگەیاند، "ئەوەی هەیە ئەنجامدانی کۆبوونەوەی نێوان نوێنەرانی وەزارەتی بەرگری و وەزارەتی ناوخۆ و کەرتە سەربازییەکانی دیکە و وەزارەتی پێشمەرگەیە بۆ تاوتوێکردنی بنکەی هەماهەنگیکردن لە پارێزگاکانی دیالە و کەرکووک و نەینەوا، ئەویش بە ئامانجی ئاڵوگۆڕی زانیاری و چاودێریکردنی جووڵەکانی تیرۆر."


شەوی شەممە، فەرماندەیی ئۆپەراسیۆنە هاوبەشەکانی عێراق ئاشکرایکردبوو کە لەگەڵ هێزەکانی پێشمەرگەی هەرێمی کوردستان گەیشتوون بە ڕێککەوتن لەسەر دامەزراندنی بنکەی هاوبەش بۆ پاراستنی ئەو ناوچانەی خاڵین لە هێزەکانی پێشمەرگە و هێزەکانی حکوومەتی فیدراڵ.

وتەبێژی ئۆپەراسیۆنە هاوبەشەکان، لیوا تەحسین خەفاجی بە ئاژانسی هەواڵی عێراقی وتبوو کە فەرماندەیی ئۆپەراسیۆنەکان کۆبوونەوەیەکی ئەمنی لەگەڵ هێزی پێشمەرگە سازداوە بە مەبەستی گەیشتن بە ڕێککەوتن لەسەر داخستنی هەموو بۆشاییە ئەمنییەکان "کە دەکرێت گرووپە تیرۆرستییەکان بە خراپ کەڵکی لێوەربگرن."

خەفاجی وتبووشی، "لە کۆبوونەوەکەدا ڕێککەوتن کراوە لەسەر دامەزراندنی بنکەی هاوبەش بۆ پاراستنی ئاسایشی ئەو ناوچانەی خاڵین لە هێزەکانی پاسەوانی هەرێم و هێزەکانی حکوومەتی فیدراڵ." ڕاشیگەیاند کە "مەترسیی چاوەڕوانکراو لە گرووپە تیرۆرستییەکان لەو ناوچانە گەورە نین و مایەی دوودڵی نین، بەڵام لەگەڵ ئەوەشدا فەرماندەیی هێزە هاوبەشەکان توانای ڕاوەدونانی ئەو گرووپانەی هەیە."

وتەبێژی ئۆپەراسیۆنە هاوبەشەکان، لیوا تەحسین خەفاجی ئاماژەی بەوەش کردبوو کە "هاوپەیمانیی نێودەوڵەتیی بەردەوامە لە بۆردوومان، دوایینیشیان بۆردوومانێکی هێزی ئاسمانیی ئیسپانی بوو بۆسەر هەندێک بنکە و پێگەی تیرۆرستی."



‌ئێستا