×


کوردی      English
تۆڕی میدیایی ئێستا
تۆڕی میدیایی ئێستا

سەرۆکی پەرلەمان جەختی لەسەر هەڵوەشاندنەوەی بڕیاری هەڵگرتنی پارێزبەندیی سۆران عومەر کردەوە

2020-06-29
ڕێواز فایەق، سەرۆکی پەرلەمانی کوردستان
فۆتۆ: .
ئێستا
ئێستا
نووسینگەی سەرۆکی پەرلەمانی کوردستان، ئەمڕۆ دووشەممە، ڕوونکردنەوەیەکی سەبارەت بە نووسراوێکی دیوانی پەرلەمان لەسەر گرتنەبەری ڕێکارەکانی ئاگادارکردنەوەی سۆران عومەر بۆ ئامادەبوونی لەبەردەم بنکەیەکی پۆلیس لە هەولێر بڵاوکردەوە، تێیدا جەخت لەسەر هەڵوەشاندنەوەی بڕیاری هەڵگرتنی پارێزبەندییەکە کرایەوە.

ڕوونکردنەوەکەی نووسینگەی سەرۆکی پەرلەمان دوای ئەوە هات، دوێنێ یەکشەممە، نووسراوێکی ئاڕاستەی نووسینگەی سلێمانیی پەرلەمان کرد و داوای کرد، ئەندامی فراکسیۆنی کۆمەڵ لە پەرلەمانی کوردستان، سۆران عومەر ئاگاداربکرێتەوە بەمەبەستی ئامادەبوون لەبەردەم بنکەی پۆلیسی خانەقا لە هەولێر.

بەپێی ڕوونکردنەوەکە، سەرۆکی پەرلەمان، ڕێواز فایەق جەختی کردووەتەوە لەسەر هەڵوەشاندنەوەی بڕیاری ژمارە 4 کە لە ڕۆژی 7ی ئایاردا دەرکرا.

لە ڕوونکردنەوەکەدا هاتووە، "سەرۆکی پەرلەمان نووسراوی ژمارەی 37ی ڕۆژی 14ی حوزەیران، ئاڕاستەی سەرۆکایەتیی ئەنجوومەنی وەزیران کردووە، بە مەبەستی بڵاوكردنەوەی لە ڕۆژنامەی فەرمیی "وەقائیعی كوردستان، بۆ ئەوەی سیفەتی ئیلزامی وەربگرێت بۆ جێبەجێكردنی".

نووسینگەی سەرۆکی پەرلەمان ئاماژەی بەوەش کرد، "ڕاستەوخۆ دوای بڵاوبوونەوەی لە ڕۆژنامەی واقائیعی کوردستان، ئاڕاستەی هەردوو دادگای تێهەڵچوونەوەی هەولێر و سلێمانی دەکرێت بۆ جێبەجێکردنی".

نووسینگەکە ئاشکراشی کرد کە پرسی نووسراوەکەی دیوانی پەرلەمان، "ئیداری و کارگێڕییە و پەیوەندی بە ناوەڕۆکی بڕیارەکەی سەرۆکی پەرلەمانەوە نییە".

دەقی ڕوونکردنەوەکە:

روونكردنەوەیەك لە نووسینگەی سەرۆكی پەرلەمانی كوردستانەوە

ئاماژە بەو دەنگۆیانەی لە هەندێ لە سایتەكان بڵاوبوەتەوە سەبارەت بەنوسراوێكی سەرۆكایەتی دیوانی پەرلەمانی كوردستان بۆ ئاگادار كردنەوەی پەرلەمانتار (سۆران عومەر) لە بەردەم دادگای لێكۆڵینەوە، بە هەموو لایەك ڕادەگەیەنین كە:

١- بەڕێز سەرۆكی پەرلەمانی كوردستان جەخت لەسەر هەڵوێستی پێشووی دەكاتەوە سەبارەت بە هەڵوەشاندنەوەی بڕیاری ژمارە (4) ی ساڵی 2020 كە بڕیارمان بە نووسراوی ژمارە (37 لە 14/6/2020) واژۆ كراوە، بۆ ئەم مەبەستەش بە نووسراوی ژمارە (4/3/1001 لە 25/6/2020) ئاڕاستەی سەرۆكایەتی ئەنجومەنی وەزیران كراوە بە مەبەستی بڵاوكردنەوەی لە ڕۆژنامەی رەسمی وەقایعی كوردستان، بۆ ئەوەی سیفەتی ئیلزامی وەربگرێت بۆ جێ بەجێ كردن.

٢- ڕاستەوخۆ دوای بڵاوبوونەوەی بڕیارەكەمان لەڕۆژنامەی رەسمی وەقایعی كوردستان ئاڕاستەی هەردوو دادگای تێهەڵچونەوەی هەولێر و سلێمانی دەكەین بۆ جێبەجێكردنی.

٣- بابەتی ئاگاداركردنەوەی پەرلەمانتاری ناوبراوی سەرەوە لەلایەن دیوانی سەرۆكایەتی پەرلەمان بابەتێكی تەواو ئیداری و رێكارییە، پەیوەندی بەناوەڕۆكی بڕیارەكەی ئێمەوە نیە.

لە كۆتاییدا دەمانەوێت رای بگەیەنین كە دۆخی هەرێمی كوردستان لەڕووی مووچەو گوزەرانی هاوڵاتیان، ئابووری، تەندرووستی، ئەمنی و سیاسی بە جۆرێكە كە ئیتر كوردستانیان لە پەرلەمانی قبوڵ ناكەن، كە هەریەكە لەو بابەتانە نەكاتە بەرنامەی كاری دانیشتنەكانی، بۆیە پێمان وایە بابەتی ناكۆكی و یەكلایی كردنەوەی سیفەتی ئیلزامی بڕیاری ژمارە (4) ی ساڵی 2020 و هەڵوەشاندنەوەكەی دەبێت بەڕێكاری یاسایی و ئیجرائی خۆیدا بڕوات و چیتر پەرلەمان و سەرۆكی پەرلەمان بەم بابەتەوە سەرقاڵ نەكرێت، لەبەر ئەوەی هەموان لە بەرامبەر بەرپرسیاریەتیەكی گرنگ داین و دەبێت ئەركی خۆمان جێ بەجێ بكەین.



‌ئێستا