سەرۆكایەتیی هەرێمی كوردستان ڕایدەگەیەنێت، بە هیچ شێوەیەک ئاگاداری کۆبوونەوەی (السلام والاسترداد) و ناوەڕۆکی بابەتەکانی نەبووە و ئه‌وه‌ی له کۆبوونه‌وه‌که ده‌رچووه، به هیچ شێویه‌ک بۆچوون و سیاسه‌ت و هه‌ڵوێستی هه‌رێمی کوردستان نییه.
لەكاردانەوەی ناڕەزایی شەقامی عێراقی و لایەنە شیعەكان لەبەرامبەر كۆبوونەوەكەی هەولێر، سەرۆكایەتیی هەرێمی كوردستان ڕاگەیەندراوێكی بڵاوكردەوە و ئاماژەی بەوەكردووە، “داوا له هه‌موو لایه‌ن و هێزه عیراقییه‌کان ده‌که‌ین بابه‌ته‌که ئارامتر وه‌رگرن و هه‌موومان چاوه‌ڕێی ئه‌نجامی لێکۆڵینه‌وه بین که له‌لایه‌ن وه‌زاره‌تی ناوخۆی حکوومه‌تی هه‌رێمی کوردستانه‌وه به‌ڕێوه ده‌چێت”.
دەقی ڕاگەیەندراوەکە:
دەربارەی کۆبوونەوەیەک کە دوێنێ هەینی 2021/9/24 بە ناوی (السلام والاسترداد) لە هەولێر ئەنجام دراوە و کاردانەوەی لێکەوتووەتەوە، ڕایدەگەیەنین کە سەرۆکایەتیی هەرێمی کوردستان بە هیچ شێوەیەک ئاگاداری کۆبوونەوەکە و ناوەڕۆکی بابەتەکانی نەبووە و ئه‌وه‌ی له کۆبوونه‌وه‌که ده‌رچووه، به هیچ شێویه‌ک بۆچوون و سیاسه‌ت و هه‌ڵوێستی هه‌رێمی کوردستان نییه.
دووپاتی دەکەینەوە کە هەر باس و هەڵوێست و ئاراستەیەک پەیوەندی بە سیاسەتی دەرەوەوە هەبێت، بەپێی دەستوور ده‌سه‌ڵاتی حکوومه‌تی فیدراڵییە و هەرێمی کوردستان لەمبارەیەوە به ته‌واوی پابەندی سیاسەتی دەرەوەی عێراقە.
داوا له هه‌موو لایه‌ن و هێزه عیراقییه‌کان ده‌که‌ین بابه‌ته‌که ئارامتر وه‌رگرن و هه‌موومان چاوه‌ڕێی ئه‌نجامی لێکۆڵینه‌وه بین که له‌لایه‌ن وه‌زاره‌تی ناوخۆی حکوومه‌تی هه‌رێمی کوردستانه‌وه به‌ڕێوه ده‌چێت.
دیوانی سەرۆکایەتیی هەرێمی کوردستان
2021/9/25
