پۆلیسی هەولێر ڕایدەگەیەنێت، لەسەر ڕووداوێكی كوشتن تۆمەتبار و سێ بەشداربووی تاوانەكە دەستگیركراون.
بەڕێوەبەرایەتیی پۆلیسی پارێزگای هەولێر ڕایگەیاند، كاتژمێر 04:00ی بەرەبەیانی ئەمڕۆ سێشەممە لە ناحیەی کەسنەزان ڕووداوێکی کوشتن ڕوویدا، دوای گەیشتنی هێزەکانی پۆلیس دەرکەوت کەسێک بەناوی (ئالان ئەحمەد عەبدوڵڵا) لەسەر کێشەیەکی کۆمەڵایەتی لەناو ئۆتۆمبێلەکەی کوژراوە.
تیمەکانی پۆلیس دوای وەرگرتنی زانیاری و لەڕێگەی کامێرای چاودێری توانرا بکەری سەرەکیی تاوانەکە بەناوی (خ.ص.ح.) دەستگیربکرێت، پۆلیسی هەولێر وادەڵێت.
ئاماژەشدەدات، سێ کەسی دیكەش بە ناوەکانی (د.خ.ص.) و (م.هـ.م.) و (هـ.ن.ع.) دەستگیرکران کە بەشداربوون لەو تاوانەدا.
بەپێی وتەی پۆلیسی هەولێر، پەڕاوی لێکۆڵینەوە بۆ ڕووداوەكە ڕێکخرا و ڕەوانەی بەردەم دادوەری لێکۆڵینەوە کرا، بڕیاردرا بە بەندکردنی تۆمەتباران بەپێی ماددەی (406) لە یاسای سزادان.
