بەڕێوەبەرایەتیی پۆلیسی ڕاپەڕین کەسێکی بە تۆمەتی دزینی ئۆتۆمبێل و ساغکردنەوەی لە پێشانگاکانی کڕێن و فرۆشتنی ئۆتۆمبێلدا دەستگیرکرد، کە لەلایەن دادگای هەولێرەوە داواکرابوو.
لە ڕاگەیەندراوێکدا بەڕێوەبەرایەتیی پۆلیسی ڕاپەڕین ئاشکرایکرد، لەلایەن پۆلیسی هەولێرەوە ئاگادارکراونەتەوە لە هاتنی تۆمەتبارێک کە لەلایەن دادگای هەولێرەوە فەرمانی دەستگیرکردنی بۆ دەرچووە و لە بنکەی پۆلیسی بەستۆرە و بنکەی پۆلیسی ئازادی لە هەولێر پەڕاوی لێکۆڵینەوەی هەیە، هێزەکانی پۆلیسی ڕاپەڕین دەستیانکردووە بە بەدواداچوون بۆ دەستگیرکردنی.
پۆلیسی ڕاپەڕین ئاماژەی بەوەکردووە، ئەو کەسەی لەلایەن دادگای هەولێرەوە داواکراوە تۆمەتبارە بە دزینی ئۆتۆمبێل و ساغکردنەوەی لە پێشانگاکانی کڕین و فرۆشتنی ئۆتۆمبێل.
لە ڕاگەیەندراوەکەدا هاتووە، تۆمەتبارەکە ناوی (ھ. م. ح)ە، لەدایکبووی 1994ە و پیشەی کاسبە، دوای لێکۆڵینەوە لەلایەن پۆلیسی راپەڕینەوە دەستگیرکراوە.
تۆمەتبارەکە بەبڕیاری دادوەر و بە ماددەی 460 لەیاسای سزادانی عێراقی ڕاگیراوە و بڕیاری ناردنی بۆ دادگای لێکۆڵینەوەی هەولێر دراوە.
