عەلی حەمەساڵح پەرلەمانتاری كوردستان، لە پەیامێكدا وەڵامی ئەبو كاروان، ئه‌ندامی مه‌كته‌بی سیاسیی حزبی شیوعیی كوردستان-ی داوەتەوە و دەڵێت، “چەندین ساڵە ڕەخنەی جددی لە پارتی و یەکێتی دەگرین بەم زمانە قسەیان نەکردووە”.
دوای ئەوەی عەلی حەمەساڵح پەرلەمانتاری كوردستان، ناوی چوار خانەنشینكراوی عەرەب بە پلەی وەزیر و بریكاری وەزیری بڵاوكردەوە، ئەبو كاروان، ئه‌ندامی مه‌كته‌بی سیاسیی حزبی شیوعیی كوردستان وەڵامی ئەو پەرلەمانتارەی دایەوە و ڕایگەیاند، “كاتێک سەرکردەکانی حیزبی شیوعی لە چیا سەربەرزەکانی کوردستان خەباتیان دەکرد، ئیخوانەکان ژمارەیەکیان بەعسی بوون”.
لە وەڵامی ئەو سەركردەیەی حزبی شیوعی-دا، عەلی حەمەساڵح پەیامێكی بەناونیشانی “بۆ بەشێک لە چەپەکان” بڵاوكردەوە و نووسیویەتی، “بەو پەڕی ڕێزەوە ناوی چوار چالاکوان و سیاسیی عێراقیم ھێناوە، کە بە ناڕەوا و نایاسایی لەسەر حسابی خەڵکی کوردستان بە پلەی وەزیر و بریکار خانەنشینکراون! نە باسی حیزبی شیوعیم کردووە و نە بیری چەپ!”.
ڕاشیگەیاندووە، “من قسەم لەسەر بنەمای یاسایی و شایستەیی کردووە، ئەوەی لە ھەر پلەیەکدا خانەنشین دەکرێت، دەبێت ھاوڵاتیی ھەرێمی کوردستان بێت و خزمەتی ڕاستەقینەی لەو پۆستەدا دیتبێت، چەندین ساڵە ڕەخنەی جدی لە پارتی و یەکێتی دەگرین بەم زمانە قسەیان نەکردووە”.
لەدرێژەی پەیامەكەیدا ئەو پەرلەمانتارە دەڵێت، “ڕەوایە ئەوەی تەقەی لە ئاسۆی قومری کرد مووچەکەی چارەکێکی ھەنا ئەدوەر نەبێت؟! کام خەباتی پێشکەشکردووە؟!. مامەڕیشە و شەھید سۆران و شێخ سەلام و دەیان قارەمانی تریش دەناسم دەشزانم مووچەی ئەم چوار سیاسی و نووسەرە چەپە چەندین جار لەوان زیاترە”.
هەروەها نووسیویەتی، “وەک خۆیان دەڵێن: چەپ بەرگری لە دادپەروەری دەکات! ئەی ڕەوایە ئێوە بە شەش ملیۆن خانەنشینبن و شەھیدانەی شەھیدەکانی خۆتان ئەحمەد بازۆکە و شیروان و بەکری مام عەباس و قادری کاکە باش و مەحمود حەسەن و هێرش چاوشین و مەلا ئیدریس و حەمەسۆفی و سۆران و جەوهەر و ئەبو ڤیان 400 ھەزار دینار بێت؟!. ئەم چوار بەڕێزەی من ناومھێناون ئەگەر خەباتگێڕن، لە عێراق یاسا بۆ زیندانیی سیاسی و تێکۆشەری دێرین ھەیە دەتوانن بەوە خانەنشینبکرێن، نەک منداڵەکانیشیان بێن لەسەر حسابی خەڵکی کوردستان مانگانە ملیۆنان دینار ببەنەوە بۆ بەغداد و ئەوروپا”.
