كۆمپانیاى فه‌یسبوك ڕایگه‌یاند، چه‌ند ئامراز و سیاسه‌تێكی نوێی خستووه‌ته‌گه‌ڕ كه له‌ڕێگه‌یانه‌وه شه‌فافییه‌ت و ڕێكارى نوێ ده‌سته‌به‌رده‌كرێن بۆ ڕیكلامه‌كانى هه‌ڵبژاردن له عێراقدا.
به‌گوێره‌ی ڕاگه‌یه‌ندراوى كۆمپانیاكه، له 25ى ئابه‌وه هه‌ر كه‌سێك له فه‌یسبوك و ئینستاگرام ڕیكلام بۆ كه‌سایه‌تیی سیاسی یان پارت و هه‌ڵمه‌تى بانگه‌شه‌ی هه‌ڵبژاردن له عێراق بكات، پابه‌ندى پرۆسه‌یه‌كی ڕێگه‌پێدانی ڕیكلام ده‌كرێت و ده‌بێت ناسنامه‌ى بسه‌لمێندرێت.
ڕوونیكردووه‌ته‌وه، ئه‌و پرۆسه‌یه له‌ڕێگه‌ى به‌كارهێنانى پێناسێكی وێنه‌داره‌وه ده‌كرێت كه حكومه‌تى عێراق ده‌ریده‌كات و جگه له‌وانه‌ى ئه‌و ڕێگه‌پێدانه‌یان هه‌ن، ڕێگه به‌هیچ كه‌سێك نادرێت بانگه‌شه‌ی هه‌ڵبژاردن له‌ڕێگه‌ی فه‌یسبوكه‌وه بكات.
كۆمپانیاى فه‌یسبوك ده‌شڵێت، “شه‌فافییه‌تی ڕیكلام له زیاتر له 195 وڵاتدا په‌یڕه‌وده‌كرێت و ڕێگه‌یه‌كه بۆ پاراستنی بێگه‌ردی و په‌یجووریی هه‌ڵبژاردنه‌كان له سه‌رتاسه‌ری جیهاندا”.
