بەیانی ئەمڕۆ لە پارکێکی شاری هەڵەبجە، لە گەڕەکی شارەوانی، تەقینەوەیەک ڕوویدا و بەهۆیەوە کەسێک گیانیلەدەستدا.
ئاسایشی هەڵەبجە دەڵێت، “زانیاریمان هەیە کەسێک دەستکاری تەقەمەنی کردووە و تەقینەوەیەک ڕویداوە، ئەو هاوڵاتییەش گیانیلەدەستداوە و لێکۆڵینەوە لە ڕووداوەکەش بەردەوامە”.
لەسەر ڕووداوەکە پۆلیسی هەڵەبجە ئاماژەی بەوەکردووە، “ئەو گەنجەی لە پارکەکەدا گیانیلەدەستداوە ناوی (ڕێكان ته‌حسین فه‌تاح)ە و لە دایکبووی (1992)ە”.
بە وتەی پۆلیس، ڕووداوەکە خۆکوژی بووە و ئەو گەنجە بە نارنجۆک کۆتایی بە ژیانی خۆی هێناوە.
هەڵەبجە و دەوروبەری بەهۆی شەڕی 8 ساڵەی نێوان عێراق و ئێران ڕووبەرێکی زۆری بە پاشماوەی تەقەمەنی پیسبووە و ئێستاش پاشماوەی جەنگ لە هەڵەبجە و ناوچەکانی دەوروبەری دەبینرێت.
