سەرۆكی حكومەتی هەرێم لەگەڵ ئەمینداری کۆمکاری عەرەبی كۆبووەوە و تیایدا پەیوەندییەكانی نێوان هەرێم و وڵاتانی عەرەبی تاوتوێكرا.
ئەمڕۆ یەكشەممە 11ی نیسان مەسرور بارزانی، سەرۆکی حکومەتی هەرێمی کوردستان پێشوازی لە ئەحمەد ئەبوغێت، ئەمینداری گشتیی کۆمکاری عەرەبی کرد و لە دیدارەکەدا بارودۆخی عێراق و پەیوەندییەکانی نێوان هەرێمی کوردستان و وڵاتانی عەرەبی تاوتوێکرا.
فەرمانگەی میدیا و زانیاری حكومەتی هەرێم بڵاویكردەوە، ئەمینداری گشتیی کۆمکاری عەرەبی، ستایشی ڕۆڵ و پێگەی گرنگیی هەرێمی کوردستانی کرد کە پێشکەوتنێکی ئابوری دیاری بەدەستهێناوە و ئاماژەی بەوەدا، سەردانەکەی بۆ هەرێمی کوردستان پەیامێکە بۆ وڵاتانی عەرەبی کە پێویستە پەیوەندییەکانیان لەگەڵ هەرێمی کوردستان لە چوارچێوەی عێراقی فیدراڵدا پەرەپێبدەن، بەتایبەتی لە بواری ئاڵوگۆڕی بازرگانی و وەبەرهێناندا.
هەر بەپێی ڕاگەیەنراوەكە، سەرۆکی حکومەت سوپاسی پشتیوانیی ئەمینداری کۆمکاری عەرەبی کرد و هیوایخواست، کۆمکاری عەرەبی ڕۆڵی گرنگیی خۆی بگێڕێت لە چارەسەرکردنی کێشە کەڵەکەبووەکانی عێراق.
جەختیشی لەوەشکردەوە، هەرێمی کوردستان خوازیارە باشترین پەیوەندی لەگەڵ وڵاتانی عەرەبیدا هەبێت.
