ئەنجومەنی باڵای دادوەری ئەمڕۆ یەكشەممە 4ی تشرینی یەكەم ڕوونكردنەوەیەكی سەبارەت بە دەنگۆی ڕادەستكردنی دۆسییەی تایبەت بەو كەسانەی تاوانی كوشتن و ڕفاندنیان بەرامبەر بە خۆپیشاندەرانی تشرینی یەكەمی ساڵی ڕابردوو ئەنجامداوە، بڵاوكردەوە.
دەشڵێت، “تائێستا تەنها دۆسییەی لێكۆڵینەوەی كارگێڕی كە پەیوەست نییە بە تۆمەتباران، بەدەستمان گەیشتووە”.
ئەنجومەنەكە ڕوونكردنەوەكەیدا وەڵامی لێدوانێكی وەزیری بەرگریی پێشووی عێراقی داوەتەوە و ڕایگەیاندووە لە دۆسییەكەدا، ئاماژە بە كەمتەرخی هیچ لایەنێك لە لێكۆڵینەوەكاندا نەكراوە.
لە سەرەتای تشرینی یەكەمی ساڵی ڕابردوو، زنجیرەیەك خۆپیشاندان لە بەغدای پایتەخت و شارەكانی دیكەی عێراق دژ بە گەندەڵی، نەبوونی خزمەتگوزاری و دەرفەتی كار بەڕێوەچوون و بەوهۆیەوە حكومەتی پێشوو بە سەرۆكایەتیی عادل عەبدولمەهدی ناچار بە دەستلەكاركێشانەوە كرا.
لەمیانەی خۆپیشاندانەكاندا بەپێی ئامارەكان 565 كەس لە خۆپیشاندەران و هێزە ئەمنییەكان كوژران و سەدانی دیكەش بریندار و بێسەروشوێن بوون.
لە 27ی تەموزی ڕابردووش، حكومەتی عێراق لیژنەیەكی بە سەرۆكایەتیی جومعە عناد، وەزیری بەرگری و عوسمان غانمی، وەزیری ناوخۆ پێكهێنا بەمەبەستی لێكۆڵینەوە لە ڕوداوەكانی كوشتن و تیرۆركردنی چالاكوانانی مەدەنی و سەرپەرشتیارانی خۆپیشاندانەكان لە بەغدای پایتەخت و شارەكانی ناوەڕاست و باشووری عێراق.
