راوێژکاری دارایی سودانی نرخی بەرمیلێک نەوتی لە بودجەی 2026 ئاشکراکرد.
مەزهەر محەمەد ساڵح، راوێژکاری دارایی سودانی، رایگەیاند، “پێشبینییە جیهانییەکان کە پشت بە شیکارییەکانی رێکخراوی (ئۆپێك) و دامەزراوە داراییە نێودەوڵەتییەکان دەبەستن، ئاماژە بەوە دەکەن کە تێکڕای نرخی بەرمیلێک نەوتی خاوی برێنت بۆ ساڵی 2026 لە نێوان 55 بۆ 62 دۆلار دەبێت، و ئەگەری زۆرە نرخەکەی لە دەوروبەری 61 دۆلار جێگیر بێت”.
دەشڵێت، پێشبینییەکان رەسمیی نین و تەنیا شیکاریی بازاڕ و توێژینەوەی نا رەسمیین کە پەیوەستن بە هاوسەنگیی خستنەڕوو و خواست لە ئابوریی جیهانیدا.
ئەوەش دەخاتەڕوو، بەوپێیە بێت لە بودجەی ساڵی 2026ی عێراقیش نرخی بەرمیلێک نەوت لەنێوان 55 بۆ 62 دۆلار دەبێت.
مەزهەر محەمەد، دەڵێت، “ئەم نرخە ئەگەری گۆڕانی هەیە و بەندە بە چەند هۆکارێک، لەوانە: پەرەسەندنی ململانێ سیاسییەکان، گۆڕانکاری لە گەشەی خواستی جیهانی بۆ وزە، بڕیارەکانی ئۆپێك پڵەس سەبارەت بە بڕی بەرهەمهێنان، و خێراکردنی هەنگاوەکان بەرەو وزەی نوێبووەوە”.
