راوێژکاری وەزارەتی کشتوکاڵی هەرێمی کوردستان رایدەگەیەنێت، بۆ ئەمساڵ رووبەرێکی زۆری زەوی بە گەنم داچێندراوە و پێشبینیدەکرێت کە بەرهەمی گەنمی جوتیاران بۆ ساڵی داهاتوو بگاتە یەک ملیۆن 500 هەزار تۆن.
رزگار حەمە خدر، راوێژکاری وەزارەتی کشتوکاڵ و سەرچاوەکانی ئاوی هەرێمی کوردستان رایگەیاند، بەپێی ئەو رووپێویەی کە ئەنجاممانداوە، سێ ملیۆن و 300 هەزار دۆنم زەوی بە گەنم داچێندراوە، لەو رێژەیە، میلۆنێک و 200 هەزار دۆنم زەوی بە شێوازی بەراو و لە رێگەی کەناڵەکانی ئاودێرییەوە ئاودەدرێن، هەروەها دوو ملیۆن و 100 هەزار زەوی دیکە، پشت بە بارانبارین دەبەستن.
دەشڵێت، پێشبینیمان وایە بۆ ساڵی 2026، بەرهەمی گەنمی جوتیاران بگاتە یەک ملیۆن و 500 هەزار تۆن.
ئەوەشی خستەڕوو، تا ئێستا وەزارەتی کشتوکاڵی عێراق پشکی هەرێمی کوردستانی دیارینەکردووە، وەزیری کشتوکاڵی هەرێمی کوردستان نامەیەکی ئاڕاستەی وەزارەتی کشتوکاڵی عێراق پشکی جوتیارانی هەرێمی کوردستان دیاریبکات.
