بەڕێوەبەرایەتیی پۆلیسی هەڵەبجە رایگەیاند، سێ تازەلاو دەستگیرکراون کە لە فێستیڤاڵی هەناری هەڵەبجە، پسوڵەیان کۆپیکردووە.
لە راگەیەندراوێکی بەڕێوەبەرایەتیی پۆلیسی هەڵەبجەدا هاتووە، پاش ئەوەی لەلایەن خاوەنی پارکی شاری یاریی هەڵەبجەوە سکاڵا تۆمارکرا کە پسوڵەی یارییەکانی شاری یاریی هەڵەبجە کۆپیکراون، توانرا سێ تۆمەتباری تازەلاو بەناوەکانی (خ. ب، ح) تەمەن 14ساڵ، (ئ .ز. خ) تەمەن13 ساڵ و(ئ. ب. ع) تەمەن 15 ساڵ بەبڕیاری دادوەر و بەپێی ماددەی 456 دەستگیربکرێن و ئێستا راگیراون.
ئاماژەی بەوەشکردووە، لەلایەن هێزە جیاوازەکانی بەڕێوبەرایەتیی پۆلیسی پارێزگای هەڵەبجە هەستان بە دەستگرتن بەسەر ئەو کەلوپەلانەی کە لەلایەن لیژنەی ئامادەکردنی فێستیڤاڵ و قائیمقامی هەڵەبجەوە چوونەژورەوەیان بۆناو فێستیڤاڵ قەدەغەکرابوو، وەک چەقۆ، دەمانچە، جگەرە و ڤەیپ بۆ تەمەنی خوار هەژدە ساڵ، هەروەها رێگریکردن لە بردنەژوورەوەی یاریی ئاگرین.
