سەرچاوەیەک رایدەگەیەنێت، سبەینێ ئەنجومەنی وەزیرانی هەرێمی کوردستان کۆدەبێتەوە و گفتوگۆی چەند پرس و دۆسیەیەک دەکات.
بەپێی زانیارییەکانی سەرچاوەیەک، سبەی چوارشەممە، ئەنجومەنی وەزیرانی هەرێمی کوردستان کاتژمێر 10ی بەیانی لە هۆڵی سەعد عەبدوڵا کۆدەبێتەوە و گفتوگۆی بارودۆخى دارایی، خەرجیی و داهاتە نانەوتییەکانی هەرێم دەکات، هەروەها تاوتوێی بەشى گەنجینەى فیدڕاڵى عێراق لەو داهاتانە دەکات.
هەر بەپێی زانیارییەکانی ئەو سەرچاوەیە، کۆبوونەوەکەی سبەینێ لە سێ بڕگە پێکدێت، لە بڕگەی یەکەمدا تاوتوێی بارودۆخی دارایی هەرێم و خەرجییەکان پاش رێککەوتنی سێ قۆڵی هەناردەکردنەوەی نەوتی هەرێم دەکرێت، لە برگەی دووەم و سێیەمدا تاوتوێی هەڵوەشانەوەی چەند بڕیارێکی پێشووی ئەنجومەنەکە و رێبەری سەلامەتی دەکرێت، کە لەلایەن وەزارەتی ناوخۆوە دەرکراوە.
