دۆناڵد ترەمپ، سەرۆکی ئەمریکا، لە دیدارێکدا لەگەڵ تەمیم بن حەمەد، ئەمیری قەتەر ژمارەیەک رێککەوتنی دوو قۆڵییان واژووکرد.
لە میانی دیدارەکەیاندا، سەرۆکی ئەمریکا پێزانینی خۆی بۆ پەیوەندییەکانی نێوان هەردوو وڵات دەربڕی و وتی، “دۆستایەتیمان دڵسۆزانە و زۆر جوانە، هەروەها دەتوانین لە ئاستە بەرزەکاندا لەگەڵ قەتەر کاربکەین”.
لای خۆیەوە ئەمیری قەتەر پێشوازیی لە سەردانەکەی ترەمپ کرد و ئاماژەی بەوەدا کە “سەردانێکی مێژوویی” بووە، بەو پێیەی یەکەم سەردانی فەرمیی سەرۆکێکی ئەمریکایە بۆ قەتەر.
وتیشی، “خۆشحاڵین بە بوونی تۆ لێرە، دەزانم تۆ پیاوی ئاشتییت و دەتەوێت ئارامی بۆ ناوچەکە بهێنیتەوە”.
هەر لە دیدارەکەیاندا، هەردوولا چەند رێككەوتنێکی ئابوری و بازرگانییان واژووكرد و دوای رێککەوتنەکەیشیان، ترەمپ رایگەیاند، قەتەر گەورەترین گرێبەستی لەگەڵ کۆمپانیای بۆینگ-ی ئەمریکی واژووکردووە، كە بەهاكەی 200 ملیار دۆلارە و ئەمەش گەورەترین خواستە لە مێژووی كۆمپانیاكەدا.
