ئەمشەو، شەممە لە چوارچێوەی ڕوبەڕوبوونەوەکانی هەفتەی 19ی خولی پلە یەکی ئیتاڵیا، یانەی ئەی سی میلان دۆڕاندنێکی چاوەڕواننەکراوی بەرانبەر ئاتالانتا بێرگامۆ تۆمارکرد.
ئەی سی میلان لە یاریگای سان سیرۆ میوانداری یانەی ئاتالانتای کرد و یاری نێوانیان بە ئەنجامی سێ گۆڵی بێوەڵام لە بەرژەوەندی کوڕانی گاسپرینی کۆتاییهات.
گۆڵەکانی ئاتالانتا لە خولەکەکانی 26 و 53 و 77 لەلایەن کریستیان ڕۆمێرۆ و جوسێپ ئیلیچیچ و دوڤان زاپاتاوە تۆمارکران.
لەلایەکی دیکەوە یانەی ئینتەرمیلان لە ستادیۆ فریۆلی بووە میوانی ئودینێزی و یاری نێوانیان بەبێ گۆڵ یەکسانبوون کۆتاییهات.
بەپێی ئەنجامە تۆمارکراوەکان، میلان سێ خاڵ و ئینتەر دوو خاڵیان لەدەستدا، بەڵام ڕیزبەندی یەکەم و دووەمی یانەکانی کالچیۆ هاوشێوەی هەفتەکانی ڕابردوو، میلان بە 43 خاڵ لە پلەی یەکەم و ئینتەر بە 41 خاڵ لە پلەی دووەم بەردەوامبوون.
