لە گەڕەکی سابونکەرانی شاری سلێمانی خانوویەکی کۆن دەکرێت بە مۆزەخانەیەکی هونەری بەناونیشانی ” مۆزەخانەی هونەری مەدحەت کاکەیی”.
قائیمقامیەتی سلێمانی رایگەیاند، بە هەماهەنگی لەگەڵ بەڕێوبەرایەتی شوێنەواری سلێمانی خانویەکی کەلەپورییان بەسەرکردەوە کە لە ئایندەیەکی نزیکدا دەبێتە مۆزەخانەیەکی هونەری بەناوی مەدحەت کاکەیی و نۆژەنکردەوەی خانووەکە لەقۆناغی کۆتاییدایە.
وتیشیان، خانووەکە کە موڵکی شوێنەواری سلێمانییە بۆ کارە هونەرییەکانی هونەرمەندی کوردی جیهانیی مەدحەت کاکەیی، سەرەڕای گرنگیدان بە هونەرو هونەرمەندان، پاراستنی کەلەپور و ڕەسانایەتی شارەکەمانەو خزمەت بە رەوتی رۆشنبیری و مێژویی سلێمانی دەکات.
ئاماژەیان بەوەشدا، لە کۆتایی ساڵی داهاتوودا مۆزەخانەکە دەکرێتەوە کە پێکهاتووە لە کارە هونەرییەکانی قۆناغە جیاوازەکانی ژیانم و پیشاندانی ئەو کارەساتانەی بەسەر میللەتەکەماندا هاتووە، لەگەڵ ئەوەشدا فێرگەیەکی تایبەت بە پێگەیاندنی ئارەزومەندانی هونەری شێوەکاری تێدا دەکرێتەوە.
گەلەری مەدحەت کاکەیی دەکەوێتە گەڕەکی سابونکەرانی شاری سلێمانی نزیک مزگەوتی هەمزەئاغا و لە ئایندەیەکی نزیکدا بەڕووی میواناندا دەکرێتەوە.
