دەستەی پیشەسازیی سەربازیی عێراق رایدەگەیەنێت، توانای بەرهەمهێنانی کارگەکانی ئۆتۆمبێلی کارەبایی ساڵانە دەگاتە 24 هەزار ئۆتۆمبێل.
قوسەی عەلی کەریم، بەڕێوەبەری پەیوەندییەکان و ڕاگەیاندن لە دەستەی پیشەسازیی سەربازیی عێراق لە لێدوانێکیدا بە رۆژنامەی سەباحی راگەیاندووە، ”کارگەکانی ئۆتۆمبێلی کارەبایی لەگەڵ کۆمپانیا ناسراوە نێودەوڵەتییەکان رێککەوتوون و ماوەیەکی زۆر دەمێننەوە و توانای بەرهەمهێنانی ساڵانەشیان دەگاتە 24 هەزار ئۆتۆمبێل لە جۆری جیاواز”.
ئاماژەی بەوەشکرد، ”مۆدێلەکان پێکدێن لە ئۆتۆمبێلی دوو دەرگا، چوار دەرگا، بارهەڵگر و چەند جۆرێکی دیکە و پاڵپشتیکاری تەکنیکیی پڕۆژەکە یەکێک دەبێت لە کۆمپانیا چینییە بەناوبانگەکان کە خاوەنی بڕوانامەی نێودەوڵەتییە لەو بوارەدا”.
دەشڵێت، ”ئەم ئۆتۆمبێلانە بەشێوەیەکی رەسمی لەلایەن حکومەتەوە نمایشدەکرێن و بۆ فرۆشتن بە هاوڵاتییان بەردەست دەبن”.
