بۆ رێگری لە بەفیڕۆدانی ئاو بەڕێوەبەرایەتیی ئاوی سلێمانی چەند داواكارییەك ئاراستەی هاوڵاتییان دەكات.
بەڕێوەبەرایەتیی ئاوی سلێمانی لە داوایەكدا روو لە هاوڵاتییان رایگەیاند، بەرەو وەرزی گەرما و پێویستیی زیاتری ئاو دەڕۆین، هیوادارین بەهەموو لایەک هاوکاری یەکتربین بۆ ئەوەی کەمترین گرفتی کەمئاوی هەبێت.
دەشڵێت، “لە شاری سلێمانی و دەوروبەری زیاتر لە ملیۆنێك هاوڵاتی سودمەند دەبن لە خزمەتگوزاریی ئاوی پڕۆژەکانمان، هەر هاوڵاتییەك رۆژانە تەنها یەك لیتر کەمتر ئاو بەفیڕۆبدات، ملیۆنان لیتر ئاو دەگەڕێتەوە و ئەو شوێنانەی گرفتی کەمئاوییان هەیە سودی لێدەبینن”.
فەرمانگەكە داواشدەكات، ئەگەر بەفیڕۆدانێکی ئاو هەبوو تۆش وەک خەمخۆرێک ئەو هاوڵاتییە ئاگاداربکەرەوە لە گرنگیی ئاو و بەفیڕۆنەدانی، ئەگەر شکاوییەكیشتان بەدیكرد، دەستبەجێ ئاگادارمان بكەنەوە.
جەختیشدەكاتەوە لەسەر گرنگیی دانانی تەواف بۆ تانكیی سەربان، بەمەبەستی رێگری لە بەفیڕۆدانی ئاو و بێبەشنەبوونی هاوشارییان لە ئاوی پێویست.
