ئەمڕۆ دابەشکردنی مووچەی مانگی شوباتی مووچەخۆرانی هەرێم کۆتایی دێت و پێشبینی دەکرێت لە چەند رۆژی داهاتودا دەست بە دابەشکردنی مووچەی مانگی ئازار بکرێت.
بەپێی ئەو لیستەی وەزارەتی دارایی و ئابوری بۆ دابەشکردنی مووچە بڵاویکردووەتەوە، ئەمڕۆ پێنجشەممە، مووچەی (هێزی زێرەڤانی، هێزی بەرگری و فریاکەوتن، یەکەکانی 70 و 80ی پێشمەرگە، بەڕێوەبەرایەتیی پۆلیسی دامودەزگاکان و سەرۆکایەتیی هەرێم) دابەشدەکرێت، و بەوەش کۆتایی بە دابەشکردنی مووچەی مانگی شوبات دێت.
پەیوەست بە مووچەی مانگی ئازار، وەفدێکی هەرێمی کوردستان بۆ دانوستان لەگەڵ بەرپرسانی عێراق سەردانی بەغدادی کرد.
شەوی رابردوو وەزارەتی دارایی هەرێم گەڕانەوەی وەفدەکەی راگەیاند و ئاماژەی بەوەکرد، وەفدەکە چەندین کۆبونەوەی گرنگ و سەرکەوتووی لەگەڵ لایەنە پەیوەندیدارەکانی حکومەتی عێراق لە سەر پرسی بودجەو مووچەی فەرمانبەران و مووچەخۆرانی هەرێمی کوردستان و چارەسەرکردنی مووچەی پێشمەرگەو هێزە ئەمنییەکان و تەواوکردنی رێکارەکانی ناردنی مووچەی مانگی ئازاری فەرمانبەرانی هەرێمی کوردستان، ئەنجامدراون.
