بەیانی ئەمڕۆ تەرمی یەکێک لەو هاوڵاتییانە دۆزرایەوە کە لە لافاوەکەی چەند رۆژی رابردووی پارێزگای دهۆکدا ئاو بردنی و بێسەروشوێن بوون.
بێوار عەبدولعەزیز وتەبێژی بەرگریی شارستانیی دهۆک بە تۆڕی میدیایی ئێستای راگەیاند، توانیومانە تەرمی یەکێک لە قوربانییەکانی لافاوەکەی 19 ی مانگ بدۆزینەوە، بەڵام تا ئێستا نەمانتوانیوە ناسنامەکەی ئاشکرابکەین، دوای ئەوەی دەبرێتە پزیشکی دادی ئەوان ئاشکرایدەکەن.
ئەمڕۆ پێنجشەممە هەڵمەتێکی فراوانی گەڕان و پشکنین بۆ دۆزینەوەی تەرمی ئەو دوو کەسەی لە لافاوەکەدا گیانیان لەدەستدابوو دەستیپێکردووە.
بەپێی ئەو زانیاریانەی بەڕێوەبەرایەتییەکە بڵاویکردووەتەوە، لە 600 بۆ هەزار کەس بەشدارن لە هەڵمەتەکەدا.
