کۆمسیۆنی باڵای سەربەخۆی هەڵبژاردنەکانی عێراق تۆمارکردنی زیاتر لە 500 رێکخراوی نێودەوڵەتی و ناوخۆیی بۆ چاودێریکردنی پڕۆسەی هەڵبژاردنی ئەنجومەنی پارێزگاکان راگەیاند.
ئەمڕۆ چوارشەممە، داود سەلمان، بەڕێوەبەری رێکارەکان و راهێنان لە کۆمسیۆن، رایگەیاند، “ژمارەی چاودێرانی هەڵبژاردنی ئەنجومەنی پارێزگاکان گەیشتە زیاتر لە 500 رێکخراوی نێودەوڵەتی و ناوخۆیی، کە ناوی خۆیان تۆمارکردووە”.
ئاماژەی بەوەشکرد، “زیاتر لە 906 تیمی چاودێری لە سەرجەم پارێزگاکان و ناوەندەکانی دەنگداندا چاودێری پرۆسەکە دەکەن و پێشێلکارییەکان تۆماردەکەن”.
بەپێی ئامارەکانی کۆمسیۆن، “ژمارەی فەرمانبەرانی کۆمسیۆن بۆ بەشدارییان لە رۆژی هەڵبژاردنی گشتی و تایبەتدا زیاتر لە 420 هەزار فەرمانبەرە”.
رۆژی 18ی کانونی یەکەمی 2023 هەڵبژاردنی ئەنجومەنی پارێزگاکانی عێراق بەڕێوەدەچێت و لە پارێزگای کەرکوک، یەکێتیی نیشتمانیی کوردستان بە هاوپەیمانێتی (کەرکوک هێزوئیرادەمانە) بەشداری دەکات کە ژمارەکەی 142ە.
