ئەمڕۆ شەممە بافڵ جەلال تاڵەبانی سەرۆكی یەكێتیی نیشتمانیی كوردستان بە سەرۆكایەتیی شاندێكی باڵای یەكێتی سەردانی یەكگرتووی ئیسلامیی كوردستانی كرد و لەلایەن مامۆستا سەڵاحەدین محەمەد بەهائەدین ئەمینداری گشتی و شاندێكی باڵای یەكگرتووەوە پێشوازی لێكرا.
لە كۆبوونەوەیەكدا تاوتوێی دوا گۆڕانكارییە سیاسییەكان، یەكخستنەوەی نێوماڵی كورد، خۆ ئامادەكردن بۆ ئەگەر و پێشهاتەكان كراو جەخت لە بەردەوامیی دیالۆگی نیشتمانی و بەرپرسیارانە كرایەوە بە بەشداریی سەرجەم لایەنە سیاسییەكان بۆ چارەسەركردنی كێشەكان لە ناوخۆی هەرێم عێراق بە شێوەیەك ژیان و گوزەرانی خەڵك پارێزراوبێت و هەوڵەكانیش بە ئاڕاستەی چارەسەركردنی كێشە داراییەكان بە تایبەت دابینكردنی مووچەی فەرمانبەران و مووچەخۆرانی هەرێم بخرێنەگەڕ.
هەر لە كۆبوونەوەكەدا هەردوولا بە پەرۆشەوە هاوڕابوون كە دۆخی هەستیاری ناوچەكە وادەخوازێت نێوماڵی كورد یەكبخرێتەوە و یەكڕیزی بپارێزرێت و كێشەو كەموكوڕییەكانی بەردەم پرسی حكومڕانی چارەسەربكرێن و ستراتیژی سیاسی حزبەكانیش بخرێنە خزمەت گشتی و ئەنجامدانی هەڵبژاردن لە كات و ساتی خۆیدا بە جۆرێك ببێتە مایەی سەقامگیریی زیاتر لە هەرێم و بەهێزتركردنی قەوارەی هەرێم.
هەر لە كۆبوونەوەكەدا تەئكیدكرایەوە لە پەرەپێدانی پەیوەندییەكانی یەكێتی و یەكگرتووی ئیسلامی كوردستان و فراوانكردنی هاریكارییەكان لەچوارچێوەی پاراستنی بەرژەوەندییە باڵاكان و خزمەتكردنی كۆمەڵانی خەڵك.
