بەبۆنەی رۆژی جیهانیی مامۆستایانەوە وەزارەتی پەروەردە پەیامێکی بڵاوکردەوە و دەڵێت، “حکومەتی هەرێم بەردەوامە لەهەوڵەکانی بۆ بەدەستهێنانی شایستە داراییەکانتان”.
لە پەیامێکی پیرۆزباییدا وەزارەتی پەروەردەی حکومەتی هەرێم رایدەگەیەنێت، “ئەمڕۆ 5ی 10 رۆژی جیھانیی مامۆستایانە و سبەی 6ی 10 رۆژی مامۆستایانی کوردستانە، وێڕای پیرۆزبایی گەرممان لە مامۆستایان بەپێویستی دەزانین سوپاس و پێزانینمان ئاڕاستەی ھەوڵ و ماندووبوون و دڵسۆزی مامۆستایان بکەین کە بەردەوامی دەدەنە پرۆسەی پێگەیاندن و پەروەردەکردنی خوێندکاران”.
ئەوەشی خستۆتەڕوو، “بەپێویستی دەزانین سوپاسی مامۆستایانی ناوچە کوردستانییەکانی دەرەوەی ئیدارەی ھەرێمی کوردستان بکەین کە بە بەردەوامی و گەشەپێدان بە خوێندنی کوردی لەو ناوچانە پارێزگاری لە ناسنامەی کوردستانی بوون دەکەن”.
لە کۆتایی پەیامەکەشیدا ئاماژە بەوە دەکات، “بۆ باشترکردنی ژیان و گوزەرانی مامۆستایان، حکومەتی هەرێمی کوردستان بەردەوامە لەهەوڵەکانی بۆ بەدەستهێنانی شایستە داراییەکانی لە حکومەتی عێراقی فیدراڵ”.
دەشڵێت، “پشتیوان بەخوای گەورە و ئیرادەی بەرزی نیشتیمانپەروەران ئەم دۆخە سەختانە تێدەپەڕن”.
