ئەندامێكی دەستەی داكۆكی لە مامۆستایان و فەرمانبەرانی ناڕازیی دەرئەنجامی سەردانەكەیان بۆ بەغداد ئاشكرادەكات و دەشڵێت، ئەندامانی لیژنەی دارایی جەختیانكردووەتەوە كە پێویستە مووچەخۆرانی هەرێم لەكاتی خۆیدا و هەموو 30 رۆژ جارێك مووچە وەربگرن.
مامۆستا نەجمەدین محەمەد ئەندامی دەستەی داكۆكی لە مامۆستایان و فەرمانبەرانی ناڕازیی لە هەرێم لە لێدوانێكدا بە تۆڕی میدیایی ئێستای راگەیاند، لە سەردانەكەمان لەگەڵ لیژنەی دارایی پەرلەمانی عێراق جەختیانكردەوە كە ئەوان لەگەڵ ئەوەدان كە پێویستە مووچەخۆرانی هەرێم لەكاتی خۆیدا و هەموو 30 رۆژ جارێك مووچەوەربگرن.
راشیگەیاند، ئەندامانی لیژنەی دارایی جەختیانكردووەتەوە كە سیستمی مووچە بەپێی یاسا یەك سیستمە و بەڵێنیانداوە كە مووچەی فەرمانبەران بە شێوەی كارت و بە ئەلیكترۆنی دابەشبكرێت كە ئەوەش هەنگاوێكە بۆ جیاكردنەوەی مووچەی فەرمانبەرانی هەرێم لە كێشە سیاسییەكان و بتوانرێت مانگانە لە كاتی خۆیدا مووچەی فەرمانبەرانی هەرێمی كوردستان دابەشبكرێت.
