میدیاکانی ئێران بڵاویانکردەوە کە لانیکەم سێ کەس بەهۆی شەپۆلێکی چڕی خۆڵبارینەوە کە بەشێک لە وڵاتەکەی گرتووەتەوە گیانیان لەدەستداوە.
میدیا ناوخۆییەکان دەڵێن، “لانیکەم سێ کەس لە پارێزگاکانی سیستان و بەلوجستان گیانیان لەدەستداوە لەکاتێکدا سەدان کەس چاودێریی پزیشکییان وەرگرتووە بەهۆی زریانی تۆز و خۆڵەوە”.
بەرپرسی بەڕێوەبردنی قەیرانەکان لە پارێزگاکە وتی، “لەم هەفتەیەدا سێ کەس گیانیان لەدەستداوە” و “لە ماوەی سێ رۆژی رابردوودا هەزار و 346 کەس داوای هاوکاریی پزیشکییان لە نەخۆشخانە و ناوەندە پزیشکییەکان کردووە.”
پێشبینییەکان کە لەلایەن سەنتەری کەشناسیی وڵاتەکەوە بڵاوکراونەتەوە باس لەوە دەکەن کە “پێشبینی دەکەن بای بەهێز و زریانی تۆز بۆ چەند رۆژێک بەردەوام بێت”.
