بافڵ جەلال تاڵەبانی لە کۆبوونەوەیەکدا لەگەڵ قەیس خەزعەلی رایگەیاند، بەپارێزگابوون و ئاوەدانکردنەوەی هەڵەبجە ئەرکی هەموولایەکە و پێویستە بەرپرسانە مامەڵە لەگەڵ ئەو شارە و خەڵکەکەی بکرێت، بەپارێزگابوونیشی قەرەبوویەکی بچووکە بەرامبەر ئەو قوربانییەی داویانە.
بافڵ جەلال تاڵەبانی سەرۆکی یەکێتیی نیشتمانیی کوردستان و قەیس خەزعەلی، ئەمینداری گشتیی بزووتنەوەی عەسائیب ئەھلی حەق ئەمڕۆ پێنجشەممە لە بەغداد کۆبوونەوە کە تێیدا ئیدانەی هێرشە تیرۆریستییەکەی سەر فڕۆکەخانەی عەربەت و شەهیدبوونی پێشمەرگە قارەمانەکانی دژەتیرۆر کرا و جەخت لە یەکخستنی هەوڵە نیشتمانییەکان کرایەوە لەپێناو پاراستنی سەقامگیری لە وڵاتدا.
داواشکرا هەموولایەک یەکدەنگ و هەڵوێست بن بۆ رووبەڕووبوونەوەی پێشێلکارییانەی دەرحەق بە سەروەریی عێراق و هەرێم ئەنجامدەدرێن.
کێشەکانی نێوان هەولێر و بەغدا تەوەرێکی دیکەی کۆبوونەوەکەبوو و هەردوولا جەختیان لە پابەندبوون بە رێککەوتنەکان و چارەسەری دەستوورییانەی کێشەکان کردەوە بەشێوەیەک کە مافی هەموولایەک پارێزراو بێت.
