دوای ئەوەی بەشێک لە جوتیارانی هەرێم گلەیان لە ڕێنمای و نوسراوی فۆڕمە تازەکەی وەزارەتی کشتوکاڵ کردبوو، ئەمڕۆ 27 ی کانونی یەکەم، وەزارەتی کشتوکاڵ فۆڕمەکەی هەڵوەشاندەوە.
بەپێی ڕاگەیەنراوێکی وەزارەتی کشتوکاڵی هەرێم، کە تێیدا هاتووە، “بێگەرد تاڵەبانی وەزیری کشتوکاڵ و سەرچاوەکانی ئاو لەپێناو بەرژەوەندی گشتی جوتیاران بڕیاریدا بە ڕاگرتنی فۆرمە تازەکەی وەرگرتنەوەی پلانی ساڵانەی گەنمی جوتیاران”.
ڕاگەیەنراوەکەی وەزارەتی کشتوکاڵ ئاماژەی بەوەشکردووە، “دوای بەدواداچوون و گوێگرتن لە کێشە و داواکاری رۆژانەی جوتیاران بەتایبەتی ئەوانەی گرفتیان هەبوو بە هۆی وەرەسەی خێزانی، لە پێناوی بەرژەوەندی گشتی جوتیاران بڕیاردرا بە ڕاگرتنی ئەو فۆرمە”.
وەزارەتی کشتوکاڵ ئەوەشی ڕاگەیاندووە کە وەرگرتنەوەی پلانی ساڵانەی گەنم هاوشێوەی ساڵانی ڕابردوو بەڕێوە دەچێت.
