بەڕێوەبەرایەتیی هاتوچۆی گەرمیان رایدەگەیەنێت، لە رووداوێكی هاتوچۆدا لەناو شاری كەلار و لە نزیك مزگەوتی ئەندازیاران، دوو كەس برینداربوون.
بەپێی راگەیەندراوێكی بەڕێوەبەرایەتیی هاتوچۆی گەرمیان كە وێنەیەكی دەست تۆڕی میدیایی ئێستا كەوتووە و تێیدا هاتووە، بەیانی ئەمڕۆ هەینی، ئۆتۆمبێلێكی جۆری بیئێم لەناو شاری كەلار و لە بەرامبەر مزگەوتی گەڕەكی ئەندازیاران، بەهۆی خێرای زیادەوە كۆنترۆڵی لە دەستداو دوو كەسی تێدا برینداربوو كە شۆفێر و سەرنشینێك بوو.
لە راگەیەندراوەكەدا هاتووە، شۆفێری ئۆتۆمبێلەكە لەدایكبووی ساڵی 2000 بووە و سەرنشینەكەش لەدایكبووی ساڵی 2001ە، هەردووكیان گەیەنراونەتە نەخۆشخانەی فریاكەوتنی شەهید هەژار بە مەبەستی وەرگرتنی چارەسەر و بەهۆی رووداوەكەوە زیانی ماددیش بەرئۆتۆمبێلەكە كەوتووە.
