ئەو بەلەمەی بە نزیکەی 60 کۆچبەرەوە لە سەرەتای هەفتەدا لە کەناڵی ئینگلیز نوقم بوو، تێیدا لانیکەم شەش کۆچبەر خنکان و ژمارەیەکیش بێسەروشوێن بوون، لەلایەن کوردەکانەوە دابینکراوە.
یەکێک لەو کۆچبەرانەی لەو بەلەمە قەرەباڵغەدابوو کە بەرەبەیانی رۆژی شەممە لە کەناڵی ئینگلیزی نێوان فەرەنسا و بەریتانیا نوقمبوو، تازەلاوێکی تەمەن 15 ساڵی ئەفغانی بوو بەناوی محەمەد “ناوەکە خوازراوە و ناوی راستەقینەی نییە”، محەمەد خەڵکی پارێزگای پەنجەشیری ئەفغانستانە و لە کارەساتەکە رزگاری بووە.
محەمەدی گەنج رووداوەکە بەمشێوەیە دەگێڕێتەوە، “رۆژەکەمان بە خراپی و شەڕ و ناکۆکی دەستیپێکرد، شەوی پێشتر بەرلەوەی گەشتەکە دەستپێبکات شەڕ و ناکۆکی لەنێوان کوردەکان و ئەفغانییەکاندا لە کامپەکەمان لە گراند سینس لەنزیک دانکیخ روویدا.
بەهۆی ناکۆکیی نێوانیانەوە دەنگی تەقە لە کامپەکە بیسترا، وەک دەوترێت ناکۆکییەکە کاتێکبووە کە زانراوە بەلەمەکە زۆر قەرەباڵغە و ژمارەیەک ئەفغانیی دیکە ویستوویانە بچنە ناو بەلەمەکەوە.
بەلەمەکەی ئەو کۆچبەرانە بەگوێرەکی لێکۆڵینەوەی پۆلیسی کەناراوەکانی فەرەنسا لەلایەن قاچاغچی و باندە کوردەکانەوە دابینکراوە و زۆرینەی سەرنشینەکانیشی ئەفغانی بوون.
لەو بەلەمەدا 60 کۆچبەر هەبوون و شەشیان خنکان و دووانیش بێسەروشوێنن، ئەوانی دیکە رزگاریان بووە.
بەپێی وتەی محەمەدی تەمەن 15 ساڵ، شەوەکەی بەر لە گەشتەکە کەشوهەوا ناجێگیربوو شەپۆلی دەریا زۆربوو، بەڵام قاچاغچییەکان سووربوون لەسەر گەشتەکە لەگەڵ مەترسییە زۆرەکانی.
