سەرۆكی ئەنجومەنی پارێزگای سلێمانی رایدەگەیەنێت، بە هەموو شێوەیەك دژی بەرزبوونەوەی نرخی كارەباین لە پڕۆژەکانی نیشتەجێبوونەکاندا و لەگەڵ لیژنەی پیشەسازی و وزە كۆبوونەوەیەك ئەنجامدەدەین و تەواوی سەرنج و پێشنیازەكانیان وەردەگرین و ناكرێت نرخی یەكەیەكی كارەبا بۆ حەوت هێندە گرانبكرێت.
ئازاد محەمەد ئەمین سەرۆكی ئەنجومەنی پارێزگای سلێمانی لە كۆنگرەیەكی رۆژنامەوانیدا رایگەیاند، ئێمە لە ئەنجومەنی پارێزگا بە هەموو شێوەیەك دژی گرانكردنی نرخی كارەباین و لیژنەی پیشەسازی و وزەی ئەنجومەنی پارێزگا كۆبوونەوەیەك ئەنجامبدەن و دواتر لەگەڵ ئێمە كۆبوونەوە دەكەن و سەرنج و پێشنیازەكانیان وەردەگرین.
راشیگەیاند، “ناكرێت نرخی یەكەیەكی كارەبا حەوت هێندە لەسەر هاوڵاتییان و بە تایبەت لە سیتییەكاندا بەرزبكرێتەوە بۆیە ئێمە چاوەڕوانی كۆبوونەوەی لیژنەی وزە و سەرنج و تێبینییەكانیان دەكەین”.
