بەڕێوەبەری چاودێریی کۆمەڵایەتیی سلێمانی رایدەگەیەنێت، ئەو دوو ژنەی لە باخی گشتی گێچەڵیان پێکرابوون رەوانەی ماڵی خۆیان کراونەتەوە و دۆسیەش بۆ تاوانەکە کراوەتەوە.
ژیار جەلال بەڕێوەبەری چاودێریی کۆمەڵایەتیی سلێمانی بە تۆڕی میدیایی ئێستای راگەیاند، “ئەو کەسانەی کە دەوترێت لە باخی گشتیی دەستدرێژی کراوەتە سەریان، دوو ژن بوون و منداڵێكیان پێبووە و لە شاری کەرکووکەوە هاتبوون لە سلێمانی دەمانەوە و شەوانەش لەناو پارکەکەدا دەمانەوە، لە راستیدا لەلایەن چەند گەنجێکەوە گێچەڵیان پێکرابوو، کاتێک ئێمە چووین بە هانایانەوە، پێمان وتن چیتان بۆ بکەین؟وتیان بمانێرنەوە بۆ شاری کەرکوک ئێمەش رەوانەمان کردنەوە و دۆسیەمان بۆ تۆمەتبارانی تاوانەکە کردووەتەوە”.
ئاماژەی بەوەشکرد، “هەر لە باخی گشتی خێزانێکی دیکەی تێدا دەمانەوە کە بە وتەی خۆیان لە شاری دهۆکەوە مابوون، بردماننە لای خۆمان شوێنی مانەوەمان بۆ دابینکردن، بەڵام هەر رۆژی دوای ئەوە بەبێ ئاگادارکردنەوەمان شوێنەکەیان جێهێشت”.
ئاشکراشیکرد، “لە ئێستادا پۆلیس و لایەنە پەیوەندیدارەکان بەدوای ئەو خێزانەدا دەگەڕێن و لە دوای دۆزینەوەیان رێوشوێنی پێویست بەرامبەریان دەگرینە بەر”.
بەڕێوەبەری چاودێری کۆمەڵایەتیی سلێمانی باسیلەوەشکرد، “هەفتانە لیژنەی هاوبەشمان هەیە، دەردەچین بۆ ناوبازاڕ و شوێنە گشتییەکان هەر حاڵەتێکی هاوشێوە هەبێت ئێمە دەست بە رێوشوێنەکانی خۆمان دەکەین”.
