ماوەی چەندین ساڵە دۆسیەی کەمپی هۆل بە چارەسەرنەکراوی ماوەتەوە و عێراقیش داوا دەکات لە رێگەی کۆنفرانسێکی نێودەوڵەتییەوە چارەسەری کۆتایی بدۆزێتەوە.
ئەمڕۆ شەممە قاسم ئەعرەجی راوێژکاری ئاسایشی نیشتمانیی عێراق لەگەڵ ئالینا رۆمانۆسکی باڵیۆزی ئەمریکا لە عێراق کۆبووەوە و لە کۆبوونەوەکەدا دوایین گۆڕانکارییە سیاسیی و هەرێمییەکان پەرەپێدانی پەیوەندییەکانی نێوان هەردوو وڵات گفتوگۆیان لەبارەوە کرا.
گفتوگۆکردن لەبارەی کەمپی هۆلەوە بەشێکی دیکە لە کۆبوونەوەکەی پێکهێنا و هەردوولا هاوڕابوون لەبارەی کشانەوەی دەوڵەتەکان لە سوریا و هاریکاریی هەمووان لەبارەی بەرەنگاربوونەوەی تیرۆر.
هەر لە کۆبوونەوەکەدا ئەعرەجی داوایکرد، ئەمریکا پشتیوانی پێشنیاری عێراق بۆ بەستنی کۆنفرانسێکی نێودەوڵەتی لەبارەی کەمپی هۆلەوە پێش کۆتایی ئەمساڵ.
لای خۆیەوە باڵیۆزی ئەمریکا لە عێراق جەختی لە بەردەوامی پاڵپشتییەکانی وڵاتەکەی بۆ عێراق کردەوە.
