لە ماوەی دوو هەفتەی رابردوودا تیمێكی پزیشكیی تایبەت سەردانی ئیدارەی گەرمیانی كردووە و پشكنینی چاو بۆ هاوڵاتییانی سنوورەكە ئەنجامدەدەن.
بەپێی راگەیەندراوێكی ئیدارەی سەربەخۆی گەرمیان كە وێنەیەكی دەست تۆڕی میدیایی ئێستا كەوتووە و تێیدا هاتووە، لە ماوەی دوو هەفتەی رابردوودا تیمێكی نەخۆشخانەی وێست ئای سەردانی ئیدارەی گەرمیانی كرد و لەسەر داوای ئیدارەی گەرمیان، پشكنینی چاو بۆ هاوڵاتییانی سنوورەكە ئەنجامدەدەن، لە سەرەتاشدا كارەكانیان لە ناحیەی رزگاری دەستپێدەكات و دواتر شوێنەكانی تر دەگرێتەوە.
لە راگەیەندراوەكەدا هاتووە، تیمەكەی نەخۆشخانەی وێست ئای بە هەماهەنگی لەگەڵ ئیدارەی گەرمیان و بەسەپەرشتی بەڕێوەبەرایەتیی گشتیی تەندروستیی گەرمیان، بەشێوازی گەڕۆك لە قەزا و ناحیەكانی سنووری ئیدارەی گەرمیاندا بێبەرامبەر پشكنینی چاو، فشاری خوێنی چاو و پشكنینی تۆڕی چاو) بۆ هاوڵاتییان ئەنجامدەدەن.
ئاماژە بۆ ئەوەش كراوە، تیمەكە رۆژانە لەكاتژمێر 9 بۆ 10ی بەیانی و تاوەكو دوانیوەڕوان لە كاتژمێر 2 بەدواوە، لە شوێنی دیارییكراودا ئامادە دەبن و هاوڵاتییان دەبینن.
